那些年送的花

由拍拖到現在，一直以為你從未送過花俾我。回家後馬上翻查日誌——原來我收過兩次！第一次是羽衣甘藍，第二次係花花米餅，兩次都係食得嘅『花』。今次你送嘅雖然都唔係真花，但起碼驟眼睇落似返朵花 😛 讚 😍！

2026 Art Basel：一場快閃與「人體展品」的藝術約會

今年趁住 VIP 時段，同愛人快閃去咗一趟香港巴塞爾藝術展（Art Basel）。

講到慢慢欣賞藝術，同佢一齊基本上係「不可能的任務」。因為佢對靜態作品完全無興趣，反而係對場內行嚟行去嘅「活動式人體展品」觀察入微。對於佢嚟講，睇「人」可能精彩過睇「畫」。

對我嚟講，今次參觀更似係一場「到此一遊」嘅儀式感，想睇吓有無啲咩特別驚喜。結果大致上同以往差不多，見到嘅依然係嗰啲熟悉嘅名字：草間彌生（Yayoi Kusama）嘅大南瓜、村上隆（Takashi Murakami）嘅笑臉花，仲有朱新建嘅水墨畫。其實藝術呢啲嘢，同時裝一樣，鍾意就鍾意，唔鍾意就係唔鍾意，好個人化。

今年有幾件作品幾吸睛，例如有一件係用世界各地嘅紙幣去創作嘅藝術品。不過，最令我印象深刻（甚至係有啲衝擊）嘅，係一張由日本攝影大師「荒木經惟」創作嘅作品，名為《123死》。老實講，我唔太明佢想表達啲咩，但以華人嘅角度睇，見到個「死」字總係覺得有啲忌諱，心裏面有種講唔出嘅怪異感。

雖然我哋兩個人嘅視點完全唔同，一個睇畫，一個睇人，甚至對作品嘅感受都各有不同，但呢種各適其適嘅「同遊」，其實都係另一種生活趣味。

我的名字，你的姓氏

究竟從哪一年開始，你的生日變成了我的生日？

明明係你生日，但你會自己 Book 枱食飯，仲買禮物送畀我。我問你點解咁做，你答我：「我的名字，你的姓氏」。唔知你幾時學到咁嘴甜，你係咪想 scam 我呀 😂？

可能係太開心嘅關係，我以為今日真係自己生日，仲有啲飲醉咗添，哈哈！愛人，祝你生日快樂，身體健康，心想事成！仲有，祝你套新片拍攝順利！