合併完之後真係好得意，我哋呢份「2 合 1」嘅人生劇本，原來係咁精彩。我哋嘅婚姻，從來唔係邊個依附邊個，而係兩個成熟、獨立、喺社會都有生存能力嘅人走埋一齊。雖然相處時充滿火花，甚至成日因為「主見」而有爭執，但原來呢啲「火花」就係我哋命定嘅溝通方式。呢種「嘈唔散」嘅特質，係因為我哋大家都經歷過人生起跌，更加明白呢段關係有幾重。
你係「龍」（心高氣傲），我係「鳳」（剛柔並濟）。「龍鳳相交」雖然會經歷「龍虎爭鬥」，但呢種火花，其實就係「良緣匹配」嘅另一種展現。
【各自精彩、互相尊重、命定相隨、永不分離】 ——呢幾句說話就係藏喺批文入面嘅靈魂，最能夠形容我哋呢段「宿命伴侶」之間嗰種奇妙嘅張力。
今年趁住 VIP 時段，同愛人快閃去咗一趟香港巴塞爾藝術展（Art Basel）。
講到慢慢欣賞藝術，同佢一齊基本上係「不可能的任務」。因為佢對靜態作品完全無興趣，反而係對場內行嚟行去嘅「活動式人體展品」觀察入微。對於佢嚟講，睇「人」可能精彩過睇「畫」。
對我嚟講，今次參觀更似係一場「到此一遊」嘅儀式感，想睇吓有無啲咩特別驚喜。結果大致上同以往差不多，見到嘅依然係嗰啲熟悉嘅名字：草間彌生（Yayoi Kusama）嘅大南瓜、村上隆（Takashi Murakami）嘅笑臉花，仲有朱新建嘅水墨畫。其實藝術呢啲嘢，同時裝一樣，鍾意就鍾意，唔鍾意就係唔鍾意，好個人化。
今年有幾件作品幾吸睛，例如有一件係用世界各地嘅紙幣去創作嘅藝術品。不過，最令我印象深刻（甚至係有啲衝擊）嘅，係一張由日本攝影大師「荒木經惟」創作嘅作品，名為《123死》。老實講，我唔太明佢想表達啲咩，但以華人嘅角度睇，見到個「死」字總係覺得有啲忌諱，心裏面有種講唔出嘅怪異感。
雖然我哋兩個人嘅視點完全唔同，一個睇畫，一個睇人，甚至對作品嘅感受都各有不同，但呢種各適其適嘅「同遊」，其實都係另一種生活趣味。
舊年錯過咗坐包廂嘅機會，今年三月終於可以補返。好多人去五月天演唱會係為咗搵回憶，但我呢次入場，好奇心大過一切。我好想睇吓啟德主場館嘅設計同結構，同我之前喺新加坡睇 Taylor Swift 嗰種震撼比起嚟，邊個會贏？
老實講，我唔係五月天嘅歌迷，識聽嘅就只有《志明與春嬌》嗰首台語歌。雖然歌詞完全聽唔明😅，但旋律就記得很清楚。今次係我第一次攞住包廂飛，由專屬通道進場嗰一刻已經覺得好正，完全唔使同人逼。另一驚喜係包廂裏面嘅招待，有齊各款食物同飲品，可以一邊飲住紅酒、白酒，一邊食住嘢咁聽歌，呢種感受真係好，成件事變得好享受，當然加分位又是「新鮮感」作怪。
喺呢個專屬空間入面，我哋可以靜靜咁觀察舞台燈光同場館結構點樣配合，呢種體驗充滿驚喜。由高處望落去成個場館，嗰種宏偉感同普通位真係差好遠。比起之前睇 Taylor Swift 坐最前排 VIP 位感受嗰種「狂熱」，包廂呢種視角同享受反而更啱我。雖然我唔係佢哋嘅 Die-hard fans，但可以用呢個咁優雅嘅角度見證到這場大型盛事，呢次體驗真係好值得。
