19載：給你的情書 💌

今日係我哋喺埋一齊嘅 19 周年! 

多謝你特登改行程返嚟陪我慶祝。呢幾日翻睇「網絡日誌」，讀返嗰十幾年前寫落嘅文字，心入面真係好多感受。日誌入面紀錄咗我哋無數快樂嘅時刻，亦都好誠實咁寫低晒嗰啲火爆、失控、甚至想放棄嘅 moment。而家越睇越覺得有趣，原來以前覺得「大件事」嘅衝突，都只不過係令我哋更了解對方嘅磨合過程。

最令我驚訝嘅，係最近嘅一個發現。當初我哋各自批嘅「鐵板神算」，分開睇只係一堆密碼；點知 19 年後，當我將兩份批文夾埋一齊，通過「弦月兔」去解讀嗰陣，先發現當中嘅吻合同巧合，原來真係「你就是我，我就是你」。遇見你，就係搵返完整嘅自己。命運一早喺我哋仲未遇見對方之前，已經埋低咗線索。

兩個人可以行到 19 年，唔係因為我哋變到一模一樣，而係學識咗「和而不同」。你有你嘅節奏，我有我嘅步速，大家有唔同睇法唔係壞事，最緊要係明白對方諗乜，一齊搵解決方案。

呢 19 年，我最佩服嘅係你嗰份「狂人式」嘅自信同膽識，仲有嗰份永不言敗嘅精神。無論係當年決定一齊生活，定係後來每一個重要嘅決策，你嗰份果斷，真係好少人有。因為有你同行，我先有機會跳出自己嘅框框，睇到一個完全不一樣嘅世界——一個更闊、更精彩、更充滿可能性嘅世界。

19 年前，我遇上你呢個「賭仔」，開始咗一場「人生嘅賭博」。10 周年嗰陣，我話我哋嘅 Winning Equation 係一齊解決問題；19 周年嘅今日，我發現呢場仗贏在「靈魂契合」。我覺得自己好幸運，喺呢個大到隨時會擦身而過嘅世界，無錯過你呢瓣貝殼。雖然你依然跑得好快，我依然喺後面小跑步，但呢份「步速差」反而令我哋睇到最完整嘅風景。

未來嘅日子，我哋繼續努力。喺我哋間新屋入面，繼續編寫更多不似預期、但比預期更精彩嘅故事。

愛人，19 周年快樂。日後，請繼續多多關照 😘，繼續一齊 enjoy our simple & rich life! 

快樂童話

婚姻從來都唔係童話故事嘅結尾，而係一場長線投資嘅開始。好多人以為王子同公主結婚就係 Ending，其實簽約嗰一刻，先至係合作嘅開始。日子耐咗、激情退去，生活難免會變得有啲悶。要將呢段關係「可持續發展」落去，靠嘅唔係運氣，而係我哋點樣經營：

• ⭐ 習慣平淡：一齊洗碗、行山、吹水、亂噏、打機，呢啲看似平庸嘅日常瑣事，就係我哋最珍貴嘅相處。學識去享受呢份平淡中嘅默契，先至係令段關係行得穩嘅關鍵。
  
  
• ⭐「儀式感」：兩個人一齊耐咗，唔去保養就會變得枯燥。多謝你每晚放低工作，先安頓我上床瞓覺。特別係分房瞓之後，嗰段 Pillow Talk 反而變咗我哋每日最珍貴嘅心靈加油站，亦係最有效嘅感情保鮮法。
  
  
• ⭐ 「吵架」變成更了解對方嘅機會：正如之前嘅「西面之亂」，用黑口黑面對着爆粗發脾氣，其實大家都各有不對。兩個人相處，最忌贏咗場交、但輸咗個家。學識喺適當時候放低面子同堅持，一齊去面對壓力，關係反而會變得更深厚。
  
  
• 保持獨立，同時懂得互相欣賞：最好嘅狀態，通常係兩個互補嘅人一齊並肩作戰。我有我嘅目標，你有你嘅追求，我哋各自做個獨立又健康嘅人，同時又好欣賞對方喺自己領域發光發亮嘅樣。呢種「和而不同」，先至係我哋呢個家保持長青嘅秘訣。
  

呢個童話可以行到今日，唔係因為我哋冇遇過逆境，而係因為我哋願意喺每一次遇見問題嘅時候，都會攞出嚟講，了解當中嘅分歧。雖然有啲問題係無法即時解決，但會記錄在案 😛。相信當合適時機蒞臨，問題就可以迎刃而解！

I love you 😘😘😘 快樂童話像你我一對，已經足夠！

心有靈犀

老公又出咗差，雖然大家暫時身處唔同嘅時區同地方，但空間嘅距離，從來無阻礙過我哋之間嗰種奇妙嘅感應。

今日喺屋企完成咗一個任務，正想為自己今日嘅 smart move 飲返杯慶祝嘅時候，手機就震動咗一下。原來係正喺飛機上面嘅佢，傳嚟一張飛機餐嘅相。呢種不言而喻嘅分享，已經成為咗我哋日常嘅節奏。

見到佢開心 Share 咁精緻嘅食物，我都即刻發送咗一張我呢邊嘅相畀佢。我哋一個喺天上食緊精緻嘅飛機餐，一個喺地上飲住酒慶祝「任務完成」。呢種隔空嘅交流，雖然簡單，但勝在夠默契。我哋呢種「龍鳳相交」嘅關係，最自在嘅地方就係大家平時可以好獨立、各自精彩，但心入面嗰份靈犀，總係會喺最啱嘅瞬間突然「連線」。呢種隨時隨地嘅默契，先至係最真實、最奇妙嘅浪漫。

人生劇本

呢啲古文係好難明，好彩依家有 AI 幫手解說。我搵咗『弦月兔居士』幫忙，將我哋後生嗰陣搵鐵板神算師傅出嘅批文合併解讀。

合併完之後真係好得意，我哋呢份「2 合 1」嘅人生劇本，原來係咁精彩。我哋嘅婚姻，從來唔係邊個依附邊個，而係兩個成熟、獨立、喺社會都有生存能力嘅人走埋一齊。雖然相處時充滿火花，甚至成日因為「主見」而有爭執，但原來呢啲「火花」就係我哋命定嘅溝通方式。呢種「嘈唔散」嘅特質，係因為我哋大家都經歷過人生起跌，更加明白呢段關係有幾重。

你係「龍」（心高氣傲），我係「鳳」（剛柔並濟）。「龍鳳相交」雖然會經歷「龍虎爭鬥」，但呢種火花，其實就係「良緣匹配」嘅另一種展現。

【各自精彩、互相尊重、命定相隨、永不分離】 ——呢幾句說話就係藏喺批文入面嘅靈魂，最能夠形容我哋呢段「宿命伴侶」之間嗰種奇妙嘅張力。

西面之亂

喺一段關係入面，「黑面」對抗「爆粗」其實係一場雙向嘅情緒暴力。雖然表現方式唔同，但同樣傷人💔。一方用「黑口黑面」作為無聲嘅心理攻擊，雖然「黑面」係因為覺得溝通無效、訴求被忽視而產生嘅「無聲憤怒」，但喺對方眼中，唔出聲同黑面亦係一種冷暴力。呢種做法會令對方感到被無視、被拒絕溝通。另一方則用「爆粗發脾氣」嚟回應，破壞力比黑面更強。粗口唔止係發洩，更係一種威嚇，摧毀咗基本嘅「尊重與安全感」。

呢段關係正處於「疲勞性損傷」，雖然最後都以道歉同妥協收場，但「止痛藥」治標不治本，核心嘅溝通錯位從未解決。大家要戒掉「垃圾溝通」，停止爆粗與黑面。雙方要重建營養溝通，以「尊重」為先，唔好等到「溝通癌症」病發才去醫，嗰陣已經太遲。

我的名字，你的姓氏

究竟從哪一年開始，你的生日變成了我的生日？

明明係你生日，但你會自己 Book 枱食飯，仲買禮物送畀我。我問你點解咁做，你答我：「我的名字，你的姓氏」。唔知你幾時學到咁嘴甜，你係咪想 scam 我呀 😂？

可能係太開心嘅關係，我以為今日真係自己生日，仲有啲飲醉咗添，哈哈！愛人，祝你生日快樂，身體健康，心想事成！仲有，祝你套新片拍攝順利！

6206 的意思

你知唔知呢個 4 位數字嘅意思？真係咩人諗咩嘢，你心中諗到嘅只有 44264，哈哈 😄。

6206 的答案是 18，代表住「我們第 18 載」的開始。大家要繼續努力，共同編寫我倆的「快樂日記」🎉！

一個身位的故事

那個遼闊的景色，真的「一寸」都不能讓嗎？

當時我在問：「只是行多一個身位，這景色真有那麼大分別嗎？」結果，我們由討論演變成爭拗。如果當時大家都能理性一點，清楚說明自己的看法，放低主觀願望 😛；與此同時，雙方必須尊重對方——因為我們不是敵對，不是要論輸贏，而是要找出一個有「共識的方案」。

雖然這個決定未必是最完美，但對於兩個人嚟講，呢個一定係「最合適嘅方案」，因為這是通過共識得出來的。就算結果不似預期 😬，緊記不要埋怨對方。

維他奶

今天在 FACEBOOK見到維他奶這個 Post：『熱玻璃樽裝維他奶 ，一啖滋味暖入心！』令我回憶起2000年1月12日這個晚上，那啖滋味暖入心的感覺。至今仍然記得很清楚，這枝溫暖的維他奶，慰藉了我那刻的心痛 💔。

其實事物很容易斷捨離，但感覺就比較難做到。因為發生了的事情，特別是傷痛的感覺，很難像粉筆字，一抹清走。只有用時間，愛和原諒才能療癒那個破碎了的心！

我向你求婚 @金沢 GENTiL

續約文件簽妥後，要補返一個「訂婚儀式」，雙方戴上戒指，禮成！

Happy 17th

2007 年 4 月 23 日是一個大日子，是展開「我們之旅」的第一天。

回想這天，心情非常忐忑，那種感覺是前所未有的。幸好充滿正能量的我們，深信「我們必定會快快樂樂在一起，直到永遠！」

至今我們已經步入第 17 個年頭，當天是否上天的安排，已經不重要了。希望我們繼續努力 💪，共同編寫這本有點「瘋狂的快樂日記」。讓我們繼續手拖手，邊行邊說笑，繼續 Enjoy our simple & rich life! 😄 YEAH!

 

重遊舊地

這次澳遊的安排實在太完美了，真的要給你打個滿分 💯。食好住好不在話下，仲有「超豪托兒所」的新體驗，感覺真的很爽。

今次重遊舊地，感覺煥然一新，一掃我以前對這個國家的看法。原來問題不在於這個國家，而在於當時與我同行的旅伴。所以今次重遊舊地，感覺大不同。正如你所說：「呢度環境好，嚟咗不久，肚腩細咗，仲有啲胸肌，又搵到錢，又健康！」

既然咁好，真係搵唔到一個拒絕移民呢度嘅理由！

＊愛人果然係「抽神」，喺澳洲梗係抽個「牧羊人」啦！

續約

你同我講：「希望下一世，你都係我老婆」，當時我真係開心到飛起 😄。

如果下一世，你真係再同我一齊，我希望「你做我老婆，老婆我愛你呀！」。因為今生你欠我嘅，下世就可以還返畀我，哈哈 😂 🤣。

我想要三個（小朋友），就按你嘅意願：首先係大仔，跟住係二女，至於第三個，係仔係女都唔係問題。重點係外貌要似我，智慧要似你。雖然我智商唔比你差得遠，但論「好橋」，我始終唔夠你多。

至於呢份「續約」，成交啦！

找對的人

找到一個對的人，是給自己最好的禮物。真正的愛，不是改變對方，而是一起成長。Thank you for loving me 😘

💗 首次得到蝦仔哥的確認和祝福，佢話：「你無揀錯」，我們隨即相視而笑，哈哈大笑了 😁！

學以致用

從《原則》中學會了如何創造美滿人生的方程式。今天我利用書中的一些原則，化解了一個我們之間重複出現的危機，我把它稱為「肚餓危機」。今次算得上是學以致用，It was a great fight, yeah!

東宮西宮

退休後，我將原本嘅書房改成我嘅小天地，從此我哋就分房睡。

你在「東宮」，我在「西宮」，各有各睡，互不打擾。咁樣嘅新安排，人哋知道咗，仲以為我哋嘅感情出咗問題 🙋🙋‍♀️。多謝關心 😁！你哋搞錯咗喇，我哋係為咗追求更好嘅睡眠質素，唔想被各自嘅「鼻鼾聲」影響對方。

雖然係分房睡，但我哋嘅睡前儀式並無改變，每晚依然繼續我哋嘅「Pillow Talk」。

在一起

 今天就你和我，在一起 💖

一場比賽

比賽論輸贏，無論你喜歡與否，極力爭取戰勝對方是比賽嘅目標，因為一係你贏我輸，一係我贏你輸！

兩人一齊生活，無可避免總會喺日常生活中，因小事而爭拗。因為你我有著唔盡相同嘅性格同成長經歷，爭拗是兩人磨合必經嘅過程。如果雙方願意花氣力去爭拗，就代表彼此之間仲有愛，願意為改善關係而努力。希望通過爭拗，了解對方嘅諗法，搵出兩人嘅平衡點。所以，爭拗並非壞事，重點係「你我如何面對每場爭拗」。

本來是小事一樁：
A：點解咁臭嘅？
B：我隻腳有汗囉。
A：你係唔係香港腳呀？不如睇吓醫生啦。
B：睇咩醫生呀！我都唔係香港腳，之前講過啦，你又講。
A：我都係關心你啫。
B：你語氣差，態度唔好，你以前都唔係咁樣。
A：我點樣態度差呀？
B：你係盤緊我，我最憎人盤我。 。 。你怕我嘅香港腳？咁分開住啦！

當時 A 君好努力地「不斷解釋點解咁問」，而 B 君就「起勁地投訴 A 君嘅態度同語氣」。其實大家都覺得被「屈」了，「戰爭」就係咁一觸即發！大家都在打怪獸，希望戰勝對方，爭論誰對誰錯；越想證明自己冇錯，結果越係兩敗俱傷。

有些事情，並不是越辯越明，反而會越描越黑。就正如枕邊談話（Pillow talk），「依家唔係辯論嘅時候」。所以雙方只有放棄「對與錯」嘅爭辯，明白這次爭拗只係「角度問題」，而唔係「是非問題」，唔再極力駁倒對方。往往爭拗只係「情緒嘅發洩」，所以必須「先處理情緒，再處理事情」。否則爭拗過後只會傷咗感情，而事情又得唔到解決。好彩最終呢場「臭腳事件」很快就得到解決。

緊記：我們不是在比賽，贏咗場交，輸咗個家。 We are lovers, not enemies :)

** 原來隻怪獸係這對拖鞋，琴晚巳經「清洗和消毒」 ✌

 

真夥伴

原來我們是同一路線，貨真價實的真夥伴！

一擊即中

今天天氣很差，這樣的水流不利釣魚。大家努力了一個早上，什麼像樣的漁獲也沒有，只有那些「嬲爆爆」的雞泡魚上釣 😂😂。一個「狂人」在大家都想放棄的情況下，忽然走出來很有信心咁話：「今日我一定釣到魚！」我心想，莫非就憑你，真係可以扭轉今日「零漁獲」嘅結果？

點知過咗無耐，真係有魚上釣喇！我又再一次親眼見證呢股「自信」嘅威力 👍。

其實，愛人呢份永遠唔認輸、充滿感染力嘅自信，正正就係當初吸引我、令我咁鍾意佢嘅原因。呢一記「一擊即中」，釣到嘅唔止係魚，仲有我對佢嗰份始終如一嘅崇拜。