不似預期

中秋過後天氣好好，愛人提議「Try Try something new」，鍾意新鮮感嘅我當然 Like 啦！我哋如常帶支水、噴定蚊怕水，就起行了。佢揀咗一條多年前行過嘅路線。下晝 3 點，我哋由大潭水塘道嘅「紫羅蘭山徑」出發，預計兩個半鐘行到淺水灣。出發嗰陣我滿心歡喜，以為呢條路同平時行開嘅家樂徑（Family Walk）差唔多，可以手拖手、邊行邊講笑，輕輕鬆鬆就到目的地。

點知，現實真係「不似預期」。路越行越窄，中間仲佈滿石頭。唔好話兩個人手拖手，就算一個人行都要小心翼翼。
我忍唔住問佢：『呢段路你真係行過？』
佢竟然答我：『行過，30 多年前。』

我個心即刻沉咗一截——又嚟喇！完全係當年「沙皮島」事件嘅翻版。嗰陣我心中越係不快，就覺得條路越難行。其實呢條路嘅風景真係好靚，有相為證，只可惜，一切都係錯在「不似預期」。