候鳥之居

今次呢個 Project 係一個全新嘅嘗試。講真，都唔知邊度嚟嘅勇氣，可能係受愛人嗰份「膽識、唔怕輸」嘅心態感染咗——本來我哋只係諗住去睇現成樓，順便去旅行，即係我哋最鍾意嘅「一雞兩吃」模式。點知睇極都唔啱心水，Agent 隨口提議不如自己起啦，佢竟然可以秒速轉軚，由睇樓變睇地，仲喺一秒鐘之內決定買落嚟！除咗膽識之外，當然塊地都係一個 good deal 😆😜。

至於呢個 Project 嘅出現，就要講返大約半年前一個晚上嘅 Pillow Talk。愛人又提起我哋冇生小朋友嘅遺憾，其實我本身係個大細路，一直幻想可以同小朋友一齊去買玩具、砌 Lego、打機，我會係仔女嘅好朋友，做「白面好人」嗰個，至於「黑面衰人」呢個角色，就當然交畀愛人啦。不過呢個諗法，喺我 30 幾歲嗰陣已經幻滅咗，因為當時愛人身體出咗大問題，佢唔想萬一自己有事，要我一個人帶住個細路咁辛苦，所以最後我哋決定唔生小朋友。

可能呢個遺憾係因佢而起，所以佢就提出咗一個補償方案，問我會唔會想收養小朋友。我同佢講，我未必係嗰種好有母愛嘅人，我想生，純粹係想睇吓生出嚟嘅細路會唔會好似我哋咁醒、咁勁、咁好玩，但呢個願望嘅「有效期」已經過咗。

既然上天安排咗我哋冇細路，人生就係咁㗎啦，過咗去就追唔返。好多人會喺遺憾入面糾結一世，但我肯定唔會咁樣。不如我哋做啲「有細路嘅家長」做唔到嘅嘢做補償——揀個我哋都鍾意嘅國家旅居，好似候鳥咁，邊度天氣好就留喺邊度，自由自在咁生活。雖然呢種諗法係有啲「阿Q」，但比起糾結過去，呢個係唯一合適嘅選擇，起碼唔會一直輸落去。

人生最型嘅地方，不在於擁有完美、沒有遺憾嘅劇本，而在於面對遺憾時，有能力在「一秒鐘」內轉身，開闢另一個戰場。呢間「候鳥之居」，就係我哋兩個人、兩個醒目腦袋一拍即合嘅傑作。