香煎鯪魚餅

香煎鯪魚餅係順德名菜，身為順德人點會唔識整鯪魚餅呢？上環新記有對手啦...如果我成功嘅話...哈哈哈！因我一向鐘意買新記鯪魚肉嚟煎魚餅或者整生菜鯪魚肉, 一斤鯪魚肉要$70,貴就貴咗Ｄ但係Ｄ鯪魚肉又鬆又彈牙而且唔會有骨, 同魚檔用機攪個Ｄ差好遠。不過睇咗蘇Good好似唔係太難, 一於學吓自家製,以後多個選擇都好。第一次自家製嘅香煎鯪魚餅出場啦, 個樣同味道都合格, 愛人當然話好味!


剁鯪魚肉嘅小Tips：
1) 鯪魚多骨, 所以一定要先切薄片, 將骨切碎才剁, 鯪魚餅就唔會有骨。
2) 要放少少鹽係鯪魚片中先剁, 咁樣更易起膠, 剁兩下鯪魚膠就自然會黐刀。
3) 調味後逐少加水, 大概加1/4飯碗水就夠。加水後魚肉會散開, 你要努力攪至起膠, 又再加水, 魚肉又再次散開, 如是者加完D水。咁樣魚餅就會又鬆又彈牙家啦！

材料:
鯪魚1條 (鯪魚連皮起肉, 只要魚柳)
芫茜（切細粒）
蔥（切細粒）
調味料:
生抽、麻油、油、糖、胡椒粉、生粉少許、水1/4碗水