「非典型」的追星記錄

有時，入場唔一定係為咗旋律，純粹係想親身入去呢個新場館，睇吓佢係咪真係做得出「世界級」嘅水準。

舊年錯過咗坐包廂嘅機會，今年三月終於可以補返。好多人去五月天演唱會係為咗搵回憶，但我呢次入場，好奇心大過一切。我好想睇吓啟德主場館嘅設計同結構，同我之前喺新加坡睇 Taylor Swift 嗰種震撼比起嚟，邊個會贏？

老實講，我唔係五月天嘅歌迷，識聽嘅就只有《志明與春嬌》嗰首台語歌。雖然歌詞完全聽唔明😅，但旋律就記得很清楚。今次係我第一次攞住包廂飛，由專屬通道進場嗰一刻已經覺得好正，完全唔使同人逼。另一驚喜係包廂裏面嘅招待，有齊各款食物同飲品，可以一邊飲住紅酒、白酒，一邊食住嘢咁聽歌，呢種感受真係好，成件事變得好享受，當然加分位又是「新鮮感」作怪。

喺呢個專屬空間入面，我哋可以靜靜咁觀察舞台燈光同場館結構點樣配合，呢種體驗充滿驚喜。由高處望落去成個場館，嗰種宏偉感同普通位真係差好遠。比起之前睇 Taylor Swift 坐最前排 VIP 位感受嗰種「狂熱」，包廂呢種視角同享受反而更啱我。雖然我唔係佢哋嘅 Die-hard fans，但可以用呢個咁優雅嘅角度見證到兩場大型盛事，呢次體驗真係好值得。