Belated Birthday Party for RC

是次party安排得比較趕, 只可為2位細小姐預備簡簡單單的朱古力cup cake, 上面加了個crispy chocolate strawberry 作裝飾, 希望小姐們有得食又有得玩, 所以蛋糕面預留位置比她們做創作。

Belated birthday party for RC at King Ludwig

Sunday Brunch @ Home

簡簡單單的一個 Homemade Sunday Brunch, 紅葉生菜配和風沙律汁，無花果松子仁沙律走汁，巴馬火腿配蜜瓜，南瓜湯。。。

隨你鍾意

今晚忽然想吃西餐, 又想吃日本菜, 終於 t-robot賜我一隻出奇蛋, 一次過滿足我2個欲望, 放工後他到『我的最愛超市』買食材，一邊推著購物車一邊跟我通電, 需要的食材很快就買斉了, 依個係我常用嘅『遙距購物』方式 ... 快, 靚, 正，Thanks, YOU! 在家吃最好就是, 喜歡中西合璧又得, 西日合璧都可以, 最好係『隨你鍾意』。

是日晚餐： 松子仁無花果沙律 (Joy to the Kitchen) , 日本清酒煮蚌湯 (和三昧鐵板廚師), 羊扒配薯角 (Jamie Oliver@NOW TV)。個蚌湯真係好好味, 好鮮甜, 差不多每次我都會order依個湯, 廚師會用一個錫紙鍋放係鐵板上面, 加入日本清酒, 酸片, 大蔥﹠日本蚌, 煮一陣, 等蚌開口, 跟住用『明火』燒走清酒。

Mango & Passion Fruit Smoothies

我唔係芒果愛好者, 只因芒果同熱情果嘅味道好襯, 一個香甜, 一個酸甜, 加起來就係又香甜又醒胃嘅味道, 係個唔錯嘅消暑沙冰, cheers !

燕麥包 & 老麵

被 “Joy to the Kitchen” by Rachel Yau 這本書嘅靚相吸引, 又再次做包啦。今次我揀左燕麥包, 因為依款包要用包籃做型, 咁就有機會用４月係日本買番黎嘅包籃啦, 好期待個包出爐。自從開始左17小時麵包後, 老麵已有一段時間無再採用, 為免又要四處找做老麵的比例, 都係馬上做個紀錄先：

老麵材料：(50g x 5個)

高筯麵粉 ... 150g

水 ... 100g

新鮮酵母 ... 6g

海鹽 ... 0.5g

＊麵團發酵2－3小時 (今次只需有1個份）

個包出爐啦，樣子都OK, 不過好唔好味呢？明早就知道 ...

鮑魚雞煲翅

依個鮑魚雞煲翅係 t-robot 嘅作品, 不過我都有幫手, t-robot 係廚房搞左半日...材料包括1磅翅, 1隻雞, 6隻鮮鮑魚, 同用左成『擔』心機煲, 當然係好好好好好好好...味啦。

今晚好好餸, 除左有鮑魚雞煲翅, 仲有 t-robot 拿手嘅『香煎英䱽』, 同『上湯浸勝瓜』。不過無影相因為太好味，只掛住食 :p

Strawberry sorbet

今日睇527學左整sorbet, 原來依款甜品咁易做, 同整smoothie差唔多, 都係將材料切粒後放入攪伴機, 攪攪攪...之後放入雪櫃, 約個零鐘攞出黎用支叉, 叉叉叉..., 整Ｄ空氣入去, 跟住再雪一陣, 咁就食得啦。 如果有雪糕機就更easy, 將攪完嘅東東放入雪糕機攪20分鐘, it's ready to serve　:)　

材料：
士多啤梨 ... 340克
檸檬汁... 1茶匙
橙酒 (Cointreau) ... 1/8 杯
橙蜜糖 (Orange Blossom Honey) ... ２湯匙

亞妹至愛...生菜包

生菜包變化多, 鐘意包乜都得, 肉鬆, 鴨鬆, 鴿鬆...其實只要將材料切成粒粒用生菜包來食, 非常方便而且好味。今次我用左蠔豉, 合桃, 肉鬆, 紅籮白, 冬菇, 芹菜, 蔥白, 材料全部切粒, 炒香, 就係咁簡單。亞妹下次黎我到我煮俾你食, 唔洗係 club house 俾多$25加生菜啦, 不過我會將蠔豉, 芹菜 & 蔥白轉為午餐肉, 玉米 & 枝豆　：）

北海道牛奶布丁(輕盈版）

Milk Top 牛奶布丁一杯＄20覺得好貴, 不過個樽仔可以循環再用, 有時都會買番屋企食。但係自家製嘅牛奶布丁可將『至肥』材料降低, 咁就更good 啦, 仲可以加入鍾意嘅Topping, yummy...

北海道牛奶布丁(輕盈版, 4小杯）

**************************************

北海道牛奶...360克

淡忌廉...70克

糖...2湯匙
魚膠片...10克

做法:
1. 魚膠片浸凍水至軟身備用 。
2. 牛奶, 淡忌廉, 砂糖及魚膠片隔熱水坐溶。
3. 將混合物用篩隔好, 放入雪櫃雪1小時即成 。

Landing soup: 老黃瓜湯

今次為愛人預備嘅 landing soup 係清熱消暑老黃瓜湯, 幫他清清熱氣。

材料：老黃瓜／赤小豆／扁豆／豬展／果皮

Passion & Hunger

近來覺得自己老左, 因為同小朋友食飯唔洗俾錢, 長大了嘅小朋友今年入到大學啦。依次証明你揀岩左, 副學士一樣入到中大新聞系, Congratulations! 做人最緊要知道自己要Ｄ咩, 因為『悠由由』又一世, (哈哈哈依句係跟壞人學嘅, 見你今日用『粗口字』話過去無努力讀書, 用依句襯番你), 唔係『發光嘅星星』唔緊要 (因為無得揀), 但 PASSION & HUNGER 唔少得, 只要專心磨利刀, 1萬小時努力過後, 你都可以係 Outliners。至於揾唔搵到心中果團『火』, 我就幫你唔到, 要靠自己啦！但我送你一個熱情果人, 希望你快Ｄ搵到團火啦。

熱情果茶曲奇食譜

熱情果紅茶 。。。1包
牛奶 。。。1 湯匙
無鹽牛油 。。。 70g
糖粉 。。。30g
鹽 。。。少許
低筋麵粉 。。。120g
梳打粉 。。。少許

1) 紅茶包剪開, 茶碎加牛奶浸泡約30mins
2) 室溫牛油加糖粉用打蛋器打至均勻, 加入(1)的茶葉
3) 篩入低筋粉, 梳打粉, 用刮刀切伴
4) 做好的麵糰放入雪櫃雪1小時
5) 用時放室溫回暖一會, 用棍碌至想要的厚度並用曲奇餅模印出
6) 將曲奇放入已預熱的焗爐內，以180℃焗約15分鐘

Strawberry smoothies

實在唔買唔得, 一來長柄士多啤梨又平又靚, 一磅裝只需$30幾蚊, 二來要買夠$88蚊換百佳環保袋, 我睇中左『寶礦力水特』果個。今日依盒士多啤梨不及前２星期做果醬的甜, 做 strawberry smoothies 要加入蜜糖調味。

花花COOKIE

本來預備做字母COOKIE, 麵團昨天巳做好, 但可惜新模出了點問題, 失敗了！所以, 櫻花季節雖然過去, 印下簡單的花形COOKIE，中間放粒入爐朱古力一樣受歡迎。

醃子薑

子薑皮蛋, 子薑牛肉, 子薑炆雞, 子薑蒸魚頭雲 ...如要一年四季都可以煮子薑乜乜同物物, 就要係有靚子薑嘅時候－醃子薑, 只要醃得好, 無發霉子薑放係雪櫃一年都無問題。今天有運行，有大師父傳授醃子薑秘方，哈哈哈...仲有工人幫忙, 8斤子薑一陣就清理好。大師父仲有時間四方城, 利害！

以下份量可以做2-3小瓶
**********************
子薑...2斤
『八珍』白米醋（2.5%酸度)...600ml
糖...240g
蒜頭...3粒
鹽...17g

做法：
1) 子薑去皮, 切薄片(老的部份不要）
2) 清洗子薑後泡水, 子薑變軟後用『筲箕』格水, 加鹽醃大約半小時。
3) 將白米醋, 糖 & 蒜頭加入鍋內, 煲至有泡泡可熄火, 小心滾瀉。放涼待用。
4) 用手輕力揸出子薑水份, 用毛巾或廚房紙巾吸乾水份,
5) 將子薑入無水的玻璃瓶, 加入巳煮好及放涼的白醋, 白醋須蓋過子薑, 封密玻璃瓶。子薑要醃一星期, 子薑變紅色就食得啦。 　

注意：
1) 不同牌子的米醋酸度有別, 八珍白米醋的酸度比較低, 所以糖份比例巳減少。
2) 用毛巾或廚房紙巾吸乾水份可以防止子薑發霉。

What a beautiful day！

Life is beautiful! :)

1) Home made hazelnut coffee

2) Truffle cheese with cracker

XO 醬雙菌炒蘆荀

這個星期的目標係『少肉多菜』, 因為在外大魚大肉, 所以在家要吃得健康D。因此今天的晚餐係蔬菜＋蔬菜＋蔬菜！這個小炒的材料全是蔬菜包括t-Robot 最愛的：雲耳, 蘆荀, 杏鮑菇﹠紅蘿蔔, 配上野味的ＸＯ醬, 結果係簡單﹠好味, 這個係『利苑』對手！

芝麻彩絲牛蒡

牛蒡纖維高, 幫助排毒, 更可以降血脂同胆固醇, 很重要是牛蒡好味而且咁有益！

芝麻彩絲牛蒡

材料：

1) 牛蒡 ... 1條 (切絲）
2) 紅蘿蔔 ... 1/2條 (切絲）
3) 青瓜 ...1/2條 (切絲）
4) 日本小白菇... 1包

5) 芝麻... 少許

調味料：塩 ／糖 ／鼓油／麻油

做法：

1) 1－3項材料去皮切絲，小白菇洗乾淨待用

2) 加少許油入鑊中，先炒紅蘿蔔絲，跟著順序加入牛蒡絲，小白菇，最後加入青瓜絲，炒軟後加調味料，最後加入芝麻，上碟！

要牛蒡唔變黑原來可以幫牛蒡洗個汽水浴，由開心大發現提供

維『Ｃ』Smoothies

維他命C可以預防傷風感冒就人人都知, 根據顧小培博士的『吃出生機』 原來維他命C仲可以保護血管, 抗癌和防止老人癡呆。益處咁多, 真係不可小看這一個『Ｃ』。

今日一於來個 維『Ｃ』smoothies補充下, 奇異果１個, 橙１個, 檸檬 1/4個 (連皮), 所有材料去皮後放入BLENDER, 打打打...加冰再打打打...DONE!

涼伴兩小碟(2): 蒜香藕片 & 芥末涼拌雲耳

夏天可以繼續涼伴...開開胃，『蒜香藕片』拼 『芥末雲耳』。

Landing Soup: 昆布海藻黃豆湯

為t-robot預備嘅 Landing 解毒湯『昆布海藻黃豆湯』, 今次用黃豆代替大山地, 個湯唔似上次咁墨汁, 清好多！