UCC 雜菜蕃茄湯意粉 ？

中午食過UCC嘅雜菜蕃茄湯意粉, 突然靈機一觸... 翻版一個做晚餐, 雜菜包括茄子, 蘑菇, 玉米, 洋蔥, 蕃茄, 湯底就用左landing soup＋茄膏, 個湯嘅味道無UCC果個咁濃, 但依然好好味道 !! 飯後甜品係咖啡同特濃朱古力百力枝 yummy 。

一人晚餐：洋蔥牛肉炒青菜

是日晚餐: 洋蔥牛肉炒小塘菜, 少肉少油多菜, 依個碟頭飯不過係250個卡路里。無超標, 今日嘅『卡路里銀行』總算收支平行。

香濃咖啡遇上香蕉蛋糕

單食依件香蕉蛋糕可能比較甜(因為我愛小甜與品質無關), 但配以意式特濃咖啡, 簡直係絕配, 太好味啦！好幸福呀！多謝朋友仔嘅出品 ;p　






*Coffee Bean: 哥斯大黎加拉米尼塔(Costa Rica La Minita)

再說一杯香濃咖啡

自從電動磨豆機退左休, Espresso咖啡機就開始放長假, 直至同事推介Fresh（一間專賣新鮮咖啡豆嘅小店）,Espresso咖啡機又要開工啦。Fresh嘅咖啡豆係『即接單即烘焙』, 而且可自選烘焙度。貪新鮮嘅我, 即時訂左部手動磨豆機同２款咖啡豆, 試下依般新鮮豆嘅香濃威力。用左１分鐘時間磨好２個大Ｔ嘅咖啡豆，原來手磨都好好玩，辛苦得來嘅咖啡真係好味D ：P

快樂的一人晚餐...茄子蘑菇意粉

茄子同蘑菇都係我鐘意嘅食材, 前幾日煮過茄子天使麵, 今日再來一個「茄子蘑菇意粉」加上蒜粒同雞湯, 結果...同樣好好味！ 之後, 仲有 Zoe 嘅 Framboise 做 Friday sweet treat, 同埋 earl grey tea. So sweet...life is wonderful!






材料：
茄子半條, 切條
蘑菇8粒，切片
意粉1人份量
蒜頭6粒,切粒
雞湯
意大利香草
黑椒
鹽

做法：
1) 先用鍋燒熱大半鍋水,水沸後加入意粉,少許油及鹽,煮至淋,盛起用冷水沖洗,備用。
2) 加油落鍋將茄子炒軟,加少許雞湯,黑椒碎及鹽調味,盛起備用。
3) 將鍋燒熱,加油炒香蒜粒,加入蘑菇炒軟,倒入意粉,加少許雞湯,加入茄子,灑上意大利香草及黑椒。

帶子配野米飯

野米有咩好？
有趣嘅係野米(Wild Rice)雖然叫做米, 原來唔係米。野米係一種係水生長嘅草嘅種子, 產於北美, 係印第安人嘅主要食糧。野米嘅外型比白米長兩倍, 係未煮熟之前係黑色, 而煮熟後會變成啡色。除左煙韌之外, 仲帶有Ｄ木頭同茶葉嘅芳香味, 最好係野米嘅卡路里低過白米, 而纖維含量就比白米高, so good!





材料：（2人份）
野米1杯,約200cc
蒜茸3粒
上湯（可用雞湯/菜湯）3/4杯，水1/4杯（合共係野米份量嘅１倍）
帶子6粒
西蘭花1個

做法：
1) 將鍋燒熱加少少油炒香蒜茸, 將野米,上湯同水加入鍋內,水沸後轉小火。須煮約50分鐘, 熄火焗15-20分鐘。
2) 帶子用Kitchen paper 吸乾水粉, 將鍋燒熱加油, 煎香帶子，上碟，食得啦！

茄子天使麵

紅酒中我最愛 Pinot Noir, 這種提子比較淡口, 可配海鮮, 肉類, 很百搭。琴晚開嘅Frei Brothers, pinot noir 還有1/3, 今天要清除它了, 煮個茄子天使麵做午餐, 應該很襯吧。



材料：
茄子１條, 切片
蕃蔔１個, 去皮切粒
天使麵２人份量
蒜頭１個,切粒
雞湯少許
意大利香草

做法：
1) 先用鍋燒熱大半鍋水, 水沸後加入天使麵, 少許油及鹽, 煮約2分鐘, 盛起用冷水沖洗，備用。
2) 將茄子加油炒軟, 加入少許黑椒碎及鹽拌勻, 備用。
3) 將鍋燒熱, 加油放入蒜粒炒香, 加入蕃蔔粒和雞湯, 倒入天使麵, 雞湯收乾, 灑上意大利香草即成。

2009 Valentine's Day

祝願人人『愛』得簡簡單單, 開開心心, 情人節快樂！

Wine：Frei Brothers, Reserve 2006, Pinot Noir
西班牙黑橄欖
黑醋雜菜沙律
煎羊排
Sweetest moment: Zoe Framboise 情人節版 (Rasberry Mousse Cake)

芝麻湯圓＠元宵

元宵佳節又點少得人月倆團圓嘅『月亮』同『湯圓』呢，一面望住個月亮, 一面食湯圓, 團團圓圓, 為52年來最圓最大嘅月亮 Cheer :)

湯圓皮: 糯米粉1杯, 冷水大約1/2杯
餡料: 芝麻醬

做法可看這里

*雖然比起第一次有進步, 但外形唔夠好, 下次再努力！

臘腸排骨煲仔飯

愛人多年前係日本買番嚟嘅鐵煲仔“南部鐵器”近日大派用場, 成為我煮煲仔飯嘅好幫手, 試左好幾次, 依家巳經『人』『煲』合一, 煮到有飯焦香嘅煲仔飯啦。




材料: 臘腸/排骨
醃料: 生抽/糖/豆粉/鼓椒/蒜

1)排骨用醃料醃半小時
2)米洗淨放少少鹽,大火煮至快干水,將臘腸同排骨放在飯面,
3)轉小火,煮約15-20分鐘,聞到飯香就OK,鍾意多Ｄ飯焦可以用大火煮多3-4分鐘,但小心過焦！
　

生日快樂：大理石Cheese Cake

今日初七,『人日』, 人人生日。祝大家身體健康, 心想事成, 開開心心! 生日當然唔少得『生日蛋糕』啦, 我的最愛 Cheese Cake, Happy Birthday to ALL :)

個蛋糕升啊升啊, 完美咁升升升, 好彩無裂, 哈哈哈, 個咖啡大理石面好香呀，I'm loving it!

"4吋" 咖啡大理石Cheese Cake, mini size最啱２人世界

材料：
忌廉芝士　。。。120g
牛油(溶)　。。。25g
糖　。。。20g
蛋　。。。1 個
檸檬汁　。。。1茶匙
即溶咖啡粉 。。。1/4茶匙

做法：
(1) 先將蛋糕模掃上牛油加麵粉備用
(2) 忌廉芝士和糖一起打至沒有糖粒便可加蛋，蛋分2-3次落，每次2分鐘
(3) 取芝士糊1茶匙, 加入即溶咖啡粉拌勻留用
(4) 將（2）加檸檬汁，最後加牛油，用手攪至混合，倒進蛋糕模內
(5) 將（3）加入（4）中, 用小尖刀或牙籤在咖啡糊上畫線
(6) 焗爐預熱180度，用180度、約焗25分鐘

新一年新開始

Quickpwn vs Pwnage
新一年新開始, 人要進步電話都一樣, 今日決心將部 2G iPhone 從 1.1.4 升級至 2.2, 先用網友推介嘅Quickpwn 去jailbreak, 以為出現個菠蘿同隻貓(ihaz success!), 一Tick過咁順利, 點知升級之後打唔到電話, 個Program認錯個電話係iPod, 真係激死人啦啦啦啦啦！今日山谷又有回音啦啦啦啦啦！

洗濕左個頭都要吹番乾家, 從新再做一次確定無做錯嘢, 明明跟足步驟都係唔成功, 唯有試下第二個jailbreak program, 用個煩Ｄ嘅 Pwnage, 終於成功啦 果然係失敗乃成功之母，哈哈哈哈哈！
Upgrade完順手做番幾張新牆紙嚟幾米一下

2009 第一爐

年初三赤口, 最好少說話多做事, 開爐焗餅是個不錯嘅選擇, 過年要意頭好, 第一爐當然不容有失啦, 做個十拿九穩嘅biscotti, 加上個『步步高升』做型, 希望今年事事順利, 開開心心！

聖誕禮物 2008 ＠工展會

『工欲善其事,必先利其器』, 要煮得好, 當然要有好嘅工具幫忙, 我嘅08聖誕禮物係一把好用嘅刀同一塊堅硬嘅砧板, 多謝你呀, 我會煮多Ｄ好嘢比你食, 等你成為真真正正嘅 Remy!

＊今晚要開工試吓新玩具 :)

聖誕節 2008

昨晚Party玩得太夜, 今早起身『偏頭痛』又發作了, 所以聖誕晚餐嘅主題係以簡單為主, 而且要多菜少肉, 我將所有食物放入焗爐焗，好快個晚餐就有得吃啦。
Merry Christmas!









平安夜Party真開心，有中、日、韓、西式美食，款款都咁好味，當然唔少得交換禮物活動, 人人都大袋細袋盡興而歸！

零食

有無食過依個牌子嘅蔬菜片呢? 好好味但係價錢貴咗Ｄ囉, 113g要$30幾, 愛人話我太奢侈, 唯有試下自家製。我將日本蕃薯去皮，切薄片, 放入焗爐焗25分鐘，出爐後加海鹽，登登登登。。。我嘅自家製蕃薯片, 焗得好似樣家。

再來一次...糯米飯

今次我抽起咗香菇, 糯米飯加入炸花生同甜豉油, 味道同樣子(係糯米飯嘅樣子)馬上回到童年時。yummy yummy :p

養顏紅棗水

今天繼續養身! 焗個紅棗水補下先，材料好簡單，10粒紅棗 (去核), 5粒桂元肉, 5粒菊花放入保溫壺焗30分鐘。

紅棗水有咩好？紅棗有補氣健脾, 養血安神嘅功效!

十穀粥

又係粥！今次係十穀粥, 依個粥嘅材料好豐富, 有糙米, 小米, 小麥, 蕎麥, 燕麥米, 燕麥片, 黑糯米, 薏仁米, 芡實&蓮子。本來個粥嘅賣點係養顏瘦身, 點知愛人為求好味, 加咗瑤柱同冬菇一齐煲,個粥當然更好味, 但咁樣點瘦身呀，請問？點解今朝要食粥，因琴晚個『一人火煱』比較Heavy囉 ！　

瑤柱香菇粥

流咗好幾日鼻水, 新買嘅『幸福傷風素』都差唔多食完, 但傷風菌仍未離開我。終於頂唔到, 今次唔只流鼻水咁簡單, 加上勁頭痛同嘔, 好辛苦呀 :( 。 係醫院打咗止嘔針, 但係車到仍然係...嘔嘔嘔, 好彩有護士小姐俾我嘅嘔吐袋, 唔係就成車都係啦！返到屋企巳經９點幾, 食完藥即上床Zzzz !

今朝起身好肚餓, 因為聞到Congee King嘅『瑤柱香菇粥』, 勁香呀！

沒有感情怎能堅持，無奈我們這樣可疑，一碗粥，叫我太滿足，誰會意，幸福就在病房開始。