亞妹至愛...生菜包

生菜包變化多, 鐘意包乜都得, 肉鬆, 鴨鬆, 鴿鬆...其實只要將材料切成粒粒用生菜包來食, 非常方便而且好味。今次我用左蠔豉, 合桃, 肉鬆, 紅籮白, 冬菇, 芹菜, 蔥白, 材料全部切粒, 炒香, 就係咁簡單。亞妹下次黎我到我煮俾你食, 唔洗係 club house 俾多$25加生菜啦, 不過我會將蠔豉, 芹菜 & 蔥白轉為午餐肉, 玉米 & 枝豆　：）

北海道牛奶布丁(輕盈版）

Milk Top 牛奶布丁一杯＄20覺得好貴, 不過個樽仔可以循環再用, 有時都會買番屋企食。但係自家製嘅牛奶布丁可將『至肥』材料降低, 咁就更good 啦, 仲可以加入鍾意嘅Topping, yummy...

北海道牛奶布丁(輕盈版, 4小杯）

**************************************

北海道牛奶...360克

淡忌廉...70克

糖...2湯匙
魚膠片...10克

做法:
1. 魚膠片浸凍水至軟身備用 。
2. 牛奶, 淡忌廉, 砂糖及魚膠片隔熱水坐溶。
3. 將混合物用篩隔好, 放入雪櫃雪1小時即成 。

Landing soup: 老黃瓜湯

今次為愛人預備嘅 landing soup 係清熱消暑老黃瓜湯, 幫他清清熱氣。

材料：老黃瓜／赤小豆／扁豆／豬展／果皮

Passion & Hunger

近來覺得自己老左, 因為同小朋友食飯唔洗俾錢, 長大了嘅小朋友今年入到大學啦。依次証明你揀岩左, 副學士一樣入到中大新聞系, Congratulations! 做人最緊要知道自己要Ｄ咩, 因為『悠由由』又一世, (哈哈哈依句係跟壞人學嘅, 見你今日用『粗口字』話過去無努力讀書, 用依句襯番你), 唔係『發光嘅星星』唔緊要 (因為無得揀), 但 PASSION & HUNGER 唔少得, 只要專心磨利刀, 1萬小時努力過後, 你都可以係 Outliners。至於揾唔搵到心中果團『火』, 我就幫你唔到, 要靠自己啦！但我送你一個熱情果人, 希望你快Ｄ搵到團火啦。

熱情果茶曲奇食譜

熱情果紅茶 。。。1包
牛奶 。。。1 湯匙
無鹽牛油 。。。 70g
糖粉 。。。30g
鹽 。。。少許
低筋麵粉 。。。120g
梳打粉 。。。少許

1) 紅茶包剪開, 茶碎加牛奶浸泡約30mins
2) 室溫牛油加糖粉用打蛋器打至均勻, 加入(1)的茶葉
3) 篩入低筋粉, 梳打粉, 用刮刀切伴
4) 做好的麵糰放入雪櫃雪1小時
5) 用時放室溫回暖一會, 用棍碌至想要的厚度並用曲奇餅模印出
6) 將曲奇放入已預熱的焗爐內，以180℃焗約15分鐘

Strawberry smoothies

實在唔買唔得, 一來長柄士多啤梨又平又靚, 一磅裝只需$30幾蚊, 二來要買夠$88蚊換百佳環保袋, 我睇中左『寶礦力水特』果個。今日依盒士多啤梨不及前２星期做果醬的甜, 做 strawberry smoothies 要加入蜜糖調味。

花花COOKIE

本來預備做字母COOKIE, 麵團昨天巳做好, 但可惜新模出了點問題, 失敗了！所以, 櫻花季節雖然過去, 印下簡單的花形COOKIE，中間放粒入爐朱古力一樣受歡迎。

醃子薑

子薑皮蛋, 子薑牛肉, 子薑炆雞, 子薑蒸魚頭雲 ...如要一年四季都可以煮子薑乜乜同物物, 就要係有靚子薑嘅時候－醃子薑, 只要醃得好, 無發霉子薑放係雪櫃一年都無問題。今天有運行，有大師父傳授醃子薑秘方，哈哈哈...仲有工人幫忙, 8斤子薑一陣就清理好。大師父仲有時間四方城, 利害！

以下份量可以做2-3小瓶
**********************
子薑...2斤
『八珍』白米醋（2.5%酸度)...600ml
糖...240g
蒜頭...3粒
鹽...17g

做法：
1) 子薑去皮, 切薄片(老的部份不要）
2) 清洗子薑後泡水, 子薑變軟後用『筲箕』格水, 加鹽醃大約半小時。
3) 將白米醋, 糖 & 蒜頭加入鍋內, 煲至有泡泡可熄火, 小心滾瀉。放涼待用。
4) 用手輕力揸出子薑水份, 用毛巾或廚房紙巾吸乾水份,
5) 將子薑入無水的玻璃瓶, 加入巳煮好及放涼的白醋, 白醋須蓋過子薑, 封密玻璃瓶。子薑要醃一星期, 子薑變紅色就食得啦。 　

注意：
1) 不同牌子的米醋酸度有別, 八珍白米醋的酸度比較低, 所以糖份比例巳減少。
2) 用毛巾或廚房紙巾吸乾水份可以防止子薑發霉。

What a beautiful day！

Life is beautiful! :)

1) Home made hazelnut coffee

2) Truffle cheese with cracker

XO 醬雙菌炒蘆荀

這個星期的目標係『少肉多菜』, 因為在外大魚大肉, 所以在家要吃得健康D。因此今天的晚餐係蔬菜＋蔬菜＋蔬菜！這個小炒的材料全是蔬菜包括t-Robot 最愛的：雲耳, 蘆荀, 杏鮑菇﹠紅蘿蔔, 配上野味的ＸＯ醬, 結果係簡單﹠好味, 這個係『利苑』對手！

芝麻彩絲牛蒡

牛蒡纖維高, 幫助排毒, 更可以降血脂同胆固醇, 很重要是牛蒡好味而且咁有益！

芝麻彩絲牛蒡

材料：

1) 牛蒡 ... 1條 (切絲）
2) 紅蘿蔔 ... 1/2條 (切絲）
3) 青瓜 ...1/2條 (切絲）
4) 日本小白菇... 1包

5) 芝麻... 少許

調味料：塩 ／糖 ／鼓油／麻油

做法：

1) 1－3項材料去皮切絲，小白菇洗乾淨待用

2) 加少許油入鑊中，先炒紅蘿蔔絲，跟著順序加入牛蒡絲，小白菇，最後加入青瓜絲，炒軟後加調味料，最後加入芝麻，上碟！

要牛蒡唔變黑原來可以幫牛蒡洗個汽水浴，由開心大發現提供

維『Ｃ』Smoothies

維他命C可以預防傷風感冒就人人都知, 根據顧小培博士的『吃出生機』 原來維他命C仲可以保護血管, 抗癌和防止老人癡呆。益處咁多, 真係不可小看這一個『Ｃ』。

今日一於來個 維『Ｃ』smoothies補充下, 奇異果１個, 橙１個, 檸檬 1/4個 (連皮), 所有材料去皮後放入BLENDER, 打打打...加冰再打打打...DONE!

涼伴兩小碟(2): 蒜香藕片 & 芥末涼拌雲耳

夏天可以繼續涼伴...開開胃，『蒜香藕片』拼 『芥末雲耳』。

Landing Soup: 昆布海藻黃豆湯

為t-robot預備嘅 Landing 解毒湯『昆布海藻黃豆湯』, 今次用黃豆代替大山地, 個湯唔似上次咁墨汁, 清好多！

Homemade strawberry jam with vanila ice cream

個JAM酸酸甜甜用來配襯 vanila ice-cream, 味道應該唔錯吧！

草莓果醬 for CUPCAKE

最近的長柄 strawberry 又香又甜, 今日買了2盒回家, 用了一盒做 strawberry jam, 我特意減低糖份, 事關個 strawberry 正合時宜, 夠甜了 :) 做出來的味道是酸酸甜甜的，I'm loving it。 Cupcake, hope you like it too!

Muffin loves Cupcake, 特別為你做的 Homemade Strawberry Jam!







草莓果醬食譜：
**************　
3樽份
1) 草莓 (淨重) ... 1000g
2) 砂糖 ... 158g (原食譜400g)
3) 檸檬汁 ... 2個
4) 蘋果膠 ... 13g (原食譜沒加果膠, 但我不喜歡果醬太稀, 所以按做比例加入蘋果膠）

做法：
1) 用大沸水煮玻璃樽幾分鐘, 再放入爐130度加熱10分鐘, 焗乾玻璃樽, 拿出放涼。（幫玻璃樽消毒, hehe...)。
2) 草莓放入煲內, 加砂糖及檸檬汁, 用大火煮沸, 慢慢會出水及起泡。
3) 轉小火繼續煮, 將起泡的雜質拿走, 直至沒有再起泡為止, 煮至草莓軟身, 下果膠至濃稠。
4) 立即放入玻璃樽內保存。

涼拌小碟(1): 檸汁杏鮑菇

夏天來臨, 又是做涼拌小碟的時候, 剛買了『珠璣小館』的小食篇, 試做了其中的一個前菜檸汁杏鮑菇, 雖然預備功夫比較多, 但味道真的很不錯, 我特別鍾意這個食譜用了檸檬做食材, 很開胃!

20分鐘快速PIZZA

忘記在哪裡找到這個不用發酵的『快速PIZZA食譜』，我不是pizza愛好者, 只因好奇... 我按食譜量好材料放入KA, 大概8分鐘麵團已經搓滑, 然後將麵團碌薄, 在麵團上加了點橄欖油, 茄醬, 蜀米, 蘑菇, 香草和芝士, 估不到味道不錯, 只是pizza個底不夠脆。愛人竟然好鍾意, 當然他的評語不能作準, 因為我整的東西他一般都話好味! 其實個Pizza不經發酵當然沒有那種麵包香, 但做法那麼簡單快速, 正好符合快餐這個原則。



食譜：10吋直徑Pizza
高筋粉 ... 125克
酵母 ... 3.5克
糖 ... 3.5克
鹽 ... 2克
橄欖油 ... 3/4茶匙
暖水 ... 140克

1) 將糖和酵母溶於水中
2) 將全部材料混合搓至麵團光滑
3) 將麵團碌薄，加點橄欖油和鍾意嘅Topping
4) 入爐 250度焗 10分鐘至pizza 邊變金黃色即可

快速香蕉合桃蛋糕

依款蛋糕好食又易做, 當然人見人愛啦! 試過好幾個香蕉蛋糕食譜, 其實各有所長, 今次這個是用高筋粉而不是常用嘅低筋粉, 所以外形比較『四正』, 而且做法最為簡單又不含『泡打粉』, 唔怕吸收過量嘅鋁, 咁就食得安心啦！

原來鋁係配製泡打粉的常用原料，佔泡打粉成分的21%至26%，例如一個110磅嘅成年人每週不應攝入多於0.043克嘅鋁, 那麼每週就不應用多過0.172克嘅泡打粉做蛋糕。 香港食物安全中心：食物鋁含量的研究報告






食譜：(3吋 x 5吋方模 & 2吋直徑muffin模)
香蕉: 1隻（約90g）
牛油: 42g
糖: 25g (原食譜35g）
蛋: 25g
高筋粉: 75g
梳打粉: 1g
鹽: 1.5g
合桃: 40g

1) 溶牛油後, 加入糖拌勻, 靜止數分鐘
2) 加入蛋和壓碎的香蕉蓉拌勻
3) 篩入鹽, 高筋粉, 梳打粉及合桃, 以切伴方法拌勻
4) 180c, 焗20-30mins至熟

食譜來自vanlily BreaDessert

昆布海藻大山地湯

昆布海藻大山地湯有清熱解毒功效, 要幫愛人解毒, 依個湯岩曬。我用左日本嘅昆布, 個湯會唔會好味Ｄ呢？

材料：海藻/昆布/大山地/豬展/果皮/密棗

菠籮果醬 (pineapple jam)

果醬當中我最愛橙皮果醬, 不過今次係跟獨角仙嘅『天然麵包香』做菠籮果醬，食譜出自藍大門點會差，做出黎嘅果醬果然好好味，雖然個吐司做得唔滿意，但有美味果醬幫忙，不合格嘅吐司竟然過到關，哈哈哈。





我用多左嘅菠籮加入檸檬，蜜糖同冰粒，用攪拌機做左杯好岩夏天嘅『菠籮檸蜜特飲』，透心涼！

17小時紅酒紅莓合桃包

放假最鍾意係屋企開支紅酒, 聽下音樂, 睇下書, 咁就一日啦! 一枝酒通常飲剩少少, 好浪費, 依家可以用黎做包『紅酒紅莓合桃包』, 個包做出黎紅紅地色,無酒味 (我以為會有Ｄ酒味), 用黎做早餐應該無問題! 個包嘅質感似合桃無花果, 因為同樣加左黑麥,但就無左合桃無花果包嘅香味, 可能係我發酵得唔好, 氣空很大很多, 做唔到個包嘅特式, 我都係鍾意合桃無花果包多Ｄ!

瑤柱冬瓜粒泡飯

琴晚飲剩嘅冬瓜粒湯加左白飯搖身一變...變成星期六嘅午餐, 係橋王獻計嘅...好橋, 哈哈...今後又多個打斧頭嘅好方法！個湯好香因為我加左種黃黃地色嘅菇入去, 不過唔記得種黃色菇叫咩名, 係工展會買嘅, 個參展商話一年黎一次, 市面無得賣, 唔知有無大話。

17小時香橙朱古力麵包

今日試新野, 係『香橙朱古力包』因為收左人地個籃仔, 就要交功課, 做個圓包試下味先。本來朱古力粒應同牛油一起加入, 但愛人唔鍾意食甜包, 我將朱古力粒係做形前加入其中一個包內試味, 今早試食覺得都幾好味, 不過橙皮唔夠, 下次要加多D。

鹽焗雞翼

星期六下午小吃：香脆易整嘅鹽焗雞翼，無油炸咁肥，但做到好似燒雞翼咁乾身！材料非常簡單，買包鹽焗雞粉就可以開工啦，超 EASY!

甜在心頭

一盒從Poland帶返黎嘅復活節禮物...直到今日先『舍』得開, 因為個朱古力就快過期囉。個朱古力不單只好味, 仲好有意思, 廣告果句『甜在心頭』 :)

泡菜豆腐湯

今晚一人開餐, 放工後去左採購, 之後回家做左個『好味, 快趣』嘅泡菜豆腐湯做晚餐, 一人晚餐可以好 FREE, yummy :p :p :p :p

芒果芝士蛋糕 for JUNE

芒果芝士蛋糕嘅難度指數只得1粒星, 應該係快,靚,正之選, 琴日下午得友人幫忙挑選香甜嘅呂宋芒, 放工後馬上去sweetie baking買材料, 快步回家巳經８點幾, 對于我依個蛋糕新手, 無高人在場睇住, 過程當然有Ｄ『論盡』。一個咁簡單嘅蛋糕都要搞到11點幾, 身心疲慮, 好似考完試咁。好彩個餅都見得人, 希望你地都鍾意啦!

Happy Birthday to June @ 雲陽閣川菜館




材料預多左，留番下午茶 :)


芒果芝士蛋糕(6吋 x 2個)
消化餅底(每個模計)
消化餅: 3塊
淡牛油: 20克

芝士餡料
芒果: 2個
忌廉芝士: 125g
淡忌廉: 120g
芒果啫喱粉: 45g = 1包
糖: 25g
魚膠粉: 1/2湯匙
熱水: 60g

製法：
1)將消化餅壓碎加入牛油溶液壓實於6吋蛋糕模內雪凍備用。
2)取出忌廉芝士,室溫待軟備用。
3)用攪伴機將1個芒果攪茸，1個切粒，取出1.5湯匙茸備用。
4)啫喱粉混入魚膠粉用大熱水拌溶,代涼。*要完全溶解,沒有起粒,水一定要夠熱
5)淡忌廉6分打發至軟身備用。*切勿打發過度
6)(機打)忌廉芝士加糖至滑身，加入芒果茸打勻, 轉手打器再加入淡忌廉, 最後加入啫喱水拌勻。
7)芒果芝士糊倒一半進餅模內，鋪上芒果粒，再倒餘下一半蓋過芒果粒，淋上1.5湯匙芒果茸，再用牙籤挑出花紋, 放入雪櫃凝固即成。

今天是生日嗎？

實在太高興啦, 今日收到好多禮物, 仲多過生日, 今晚可能會笑醒, 哈哈哈哈!