菠籮果醬 (pineapple jam)

果醬當中我最愛橙皮果醬, 不過今次係跟獨角仙嘅『天然麵包香』做菠籮果醬，食譜出自藍大門點會差，做出黎嘅果醬果然好好味，雖然個吐司做得唔滿意，但有美味果醬幫忙，不合格嘅吐司竟然過到關，哈哈哈。





我用多左嘅菠籮加入檸檬，蜜糖同冰粒，用攪拌機做左杯好岩夏天嘅『菠籮檸蜜特飲』，透心涼！

17小時紅酒紅莓合桃包

放假最鍾意係屋企開支紅酒, 聽下音樂, 睇下書, 咁就一日啦! 一枝酒通常飲剩少少, 好浪費, 依家可以用黎做包『紅酒紅莓合桃包』, 個包做出黎紅紅地色,無酒味 (我以為會有Ｄ酒味), 用黎做早餐應該無問題! 個包嘅質感似合桃無花果, 因為同樣加左黑麥,但就無左合桃無花果包嘅香味, 可能係我發酵得唔好, 氣空很大很多, 做唔到個包嘅特式, 我都係鍾意合桃無花果包多Ｄ!

瑤柱冬瓜粒泡飯

琴晚飲剩嘅冬瓜粒湯加左白飯搖身一變...變成星期六嘅午餐, 係橋王獻計嘅...好橋, 哈哈...今後又多個打斧頭嘅好方法！個湯好香因為我加左種黃黃地色嘅菇入去, 不過唔記得種黃色菇叫咩名, 係工展會買嘅, 個參展商話一年黎一次, 市面無得賣, 唔知有無大話。

17小時香橙朱古力麵包

今日試新野, 係『香橙朱古力包』因為收左人地個籃仔, 就要交功課, 做個圓包試下味先。本來朱古力粒應同牛油一起加入, 但愛人唔鍾意食甜包, 我將朱古力粒係做形前加入其中一個包內試味, 今早試食覺得都幾好味, 不過橙皮唔夠, 下次要加多D。

鹽焗雞翼

星期六下午小吃：香脆易整嘅鹽焗雞翼，無油炸咁肥，但做到好似燒雞翼咁乾身！材料非常簡單，買包鹽焗雞粉就可以開工啦，超 EASY!

甜在心頭

一盒從Poland帶返黎嘅復活節禮物...直到今日先『舍』得開, 因為個朱古力就快過期囉。個朱古力不單只好味, 仲好有意思, 廣告果句『甜在心頭』 :)

泡菜豆腐湯

今晚一人開餐, 放工後去左採購, 之後回家做左個『好味, 快趣』嘅泡菜豆腐湯做晚餐, 一人晚餐可以好 FREE, yummy :p :p :p :p

芒果芝士蛋糕 for JUNE

芒果芝士蛋糕嘅難度指數只得1粒星, 應該係快,靚,正之選, 琴日下午得友人幫忙挑選香甜嘅呂宋芒, 放工後馬上去sweetie baking買材料, 快步回家巳經８點幾, 對于我依個蛋糕新手, 無高人在場睇住, 過程當然有Ｄ『論盡』。一個咁簡單嘅蛋糕都要搞到11點幾, 身心疲慮, 好似考完試咁。好彩個餅都見得人, 希望你地都鍾意啦!

Happy Birthday to June @ 雲陽閣川菜館




材料預多左，留番下午茶 :)


芒果芝士蛋糕(6吋 x 2個)
消化餅底(每個模計)
消化餅: 3塊
淡牛油: 20克

芝士餡料
芒果: 2個
忌廉芝士: 125g
淡忌廉: 120g
芒果啫喱粉: 45g = 1包
糖: 25g
魚膠粉: 1/2湯匙
熱水: 60g

製法：
1)將消化餅壓碎加入牛油溶液壓實於6吋蛋糕模內雪凍備用。
2)取出忌廉芝士,室溫待軟備用。
3)用攪伴機將1個芒果攪茸，1個切粒，取出1.5湯匙茸備用。
4)啫喱粉混入魚膠粉用大熱水拌溶,代涼。*要完全溶解,沒有起粒,水一定要夠熱
5)淡忌廉6分打發至軟身備用。*切勿打發過度
6)(機打)忌廉芝士加糖至滑身，加入芒果茸打勻, 轉手打器再加入淡忌廉, 最後加入啫喱水拌勻。
7)芒果芝士糊倒一半進餅模內，鋪上芒果粒，再倒餘下一半蓋過芒果粒，淋上1.5湯匙芒果茸，再用牙籤挑出花紋, 放入雪櫃凝固即成。

今天是生日嗎？

實在太高興啦, 今日收到好多禮物, 仲多過生日, 今晚可能會笑醒, 哈哈哈哈!

第四日的肉鬆海苔包

17小時包包真真真真真真利害, 個包係星期天出爐, 今日係星期三, 72小時後個包仍然咁好味, 唔怪得大家都為17小時包而瘋狂！

17小時肉鬆海苔包

依次唔係第一次做肉鬆海苔包, 以前跟孟老師的100道麵包做過好幾次, 今次我改用17小時的白吐司做包底, 效果好好, 當然啦, 係17小時麻！其實個包唔止17小時, 中種係雪櫃發酵左60小時, 所以, 個包係60小時肉鬆海苔包至真。依個亦係17小時發酵法可愛之處, 中種最長可以放雪櫃發酵72小時, 今日做好個種, 碰岩第二日無時間做包, 可以等多一日再做都無問題。

Landing soup: 蘋果雪耳豬展湯

預備左個滋潤 landing soup 俾愛人享用, 依個湯有滋養補肺, 潤肌膚嘅功效, 最啱 frequent flyer飲用。材料包括蘋果, 雪耳, 豬展, 無花果, 陳皮&南北杏。飲完湯再做個水份 mask, 潤番曬 :)

宇治抹茶豆腐布甸

天氣開始熱, 又係豆腐布甸出場嘅時候啦, 豆腐布甸好掛住你呀！我用左係大板買番黎嘅『宇治抹茶粉』做依個布甸, 做出黎嘅顏色就好正啦, 唔知味道點呢？
*抹茶粉係送俾料理達人嘅至佳手信, 食譜按這里

合桃無花果麵包（17小時中種發酵）

17小時中種發酵第二個成品: 合桃無花果麵包, 水份減至56％,當然一TAKE過啦。因為我嘅刀工唔叻, 要學作者係包面介16刀,實在係個大挑戰。

結果, 我只係包面介左1刀, 個樣當然同本書果個有好大分別啦！

就係用依把新刀,係sweetie有售

印模曲奇 for Winnie

Winnie 鍾意食藍罐曲奇, 小朋友總愛這種大人受不了的甜。我將食譜嘅糖粉加甜10％, 希望今次做到她鍾意嘅「個種甜」！

栗米麵包（17小時中種發酵）

發酵過度, 水份過高, 無法做形, 一次又一次嘅失敗, 要自家製麵包真係咁難咩？試過唔同方法都係有時「得」有時「失」, 依個就係成日聽到人家話麵包好難搞嘅原因。點解咁難搞都要學, 因為我愛挑戰, 相信「失敗乃成功之母」, 只要唔放棄, 失敗已有, 成功在望啦。亞Q精神, 哈哈哈...

經過3次失敗, 用17小時發酵方法(低溫冷藏中種)做出黎嘅第一個成品: 栗米麵包, 確係特別好味。不過唔知有幾多分？我post左個功課係「天然麵包香」作者「獨⻆仙」嘅網站, 唔知那位仙姐會不會回覆我呢。
1st Attempt:





2nd attempt:

南瓜湯

跟「獨角仙＠籃色大門」食譜煮我第一次嘅南瓜湯, 好好味, 美中不足無自家製麵包配襯, 否則依個Sunday Lunch更完滿。

sunday lunch menu
***********************
soup: 南瓜湯
main course: 蒜香帶子意粉
dessert: 薑汁 cream brulee
coffee or Tea: peppermint tea

雙色印模曲奇 for CCC

已有一段時間無做印模曲奇, 最近為左「玻璃曲奇」又再開爐。這個特別為CCC而做嘅「花心曲奇」樣子靚嗎？
* 以下食譜係做原味嘅材料, 要做雙色就要將材料分2份, 朱古力個份嘅低筋粉減少12g, 轉成無糖朱古力粉 食譜按這里

香蕉合桃朱古力小方樽

今次用左新方法整依個小方樽, 比起孟老師的100道小蛋糕食譜鬆軟。





材料及做法：
香蕉 ... 2條 (梅花點香蕉約200g)
檸檬汁 ... 1小匙
Rum酒 ... 1小匙
無鹽牛油 ... 90g(原食譜100g）
鹽 ... 少許
糖 (a) ... 40g (原食譜50g）
蛋黃 ... 2 個
蛋白 ... 2 個
糖 (b) ... 25g (原食譜30g)
低筋粉 ... 135g (如要做原味可將15g無糖朱古力粉轉成低筋粉)
無糖朱古力粉 ... 15g
泡打粉 ... 1/2 茶匙
梳打粉 ... 1/2 茶匙

1. 香蕉壓爛, 加入檸檬汁及Rum酒,
2. 牛油室溫放軟加入砂糖 (a) 分兩次拌勻,
3. 加入蛋黃拌勻 (每隻加入要充份拌勻才可加入第二隻), 再加入香蕉茸拌勻,
4. 蛋白加鹽打一會, 然後分三次加入砂糖 (b) 打至企身,
5. 將一半已篩粉類及一半蛋白霜混入 (3) 拌勻,
6. 將餘下的已篩粉類及蛋白霜混入麵糊,
7. 預熱焗爐 170 度焗 30分鐘

雙拼

一直鼓唔起勇氣再做第一次就失敗了嘅「杞子桂花糕」, 因為整得實在太難食！一個忽發奇想：通透嘅桂花糕 crossover 雪白嘅杏仁豆腐, 唔知味道會點呢? 會係: 又有桂花味, 又有杏仁味, 岩味岩晒你 。定還是: 太多桂花味, 杏仁味就無碇企, 等到杏仁味多翻黎, 桂花味又唔爭氣。。。結果係: 桂花味無定企。




桂花糕材料
熱水... 125ml
凍水...100ml
魚膠粉...12g
糖...40g
桂花糖...1湯匙

桂花糕做法：
1) 將魚膠粉加糖混合, 加入熱水拌勻至完全溶解。（可坐熱水加快溶解）
2) 將桂花糖加入拌勻後, 再加入凍水拌勻。
3) 倒入模中待涼後放入雪櫃內雪約30分鐘。
4) 凝固後將杏仁豆腐慢慢倒在桂花糕上,放入雪櫃內凝固。

杏仁豆腐材料及做法