螺頭花膠湯

“花膠” 有益好味係我最愛嘅滋補湯水, 唔好以為煲依個湯要好多工夫, 只要預早將Ｄ花膠發好然後放入Freezer, 用嘅時候攞出嚟解凍, 咁就方便好多啦。

湯料：螺頭2個／花膠1塊／杞子／
准山／蓮子／百合／豬展

發花膠方法：
1) 用水浸8小時
2) 水滾後放入花膠＋薑片＋酒
3) 小火煲15分鐘

花膠有咩好? 花膠無膽固醇, 無脂肪含天然膠質, 有豐富嘅纖維素, 蛋白質和維他命E。

香煎鯪魚餅

香煎鯪魚餅係順德名菜，身為順德人點會唔識整鯪魚餅呢？上環新記有對手啦...如果我成功嘅話...哈哈哈！因我一向鐘意買新記鯪魚肉嚟煎魚餅或者整生菜鯪魚肉, 一斤鯪魚肉要$70,貴就貴咗Ｄ但係Ｄ鯪魚肉又鬆又彈牙而且唔會有骨, 同魚檔用機攪個Ｄ差好遠。不過睇咗蘇Good好似唔係太難, 一於學吓自家製,以後多個選擇都好。第一次自家製嘅香煎鯪魚餅出場啦, 個樣同味道都合格, 愛人當然話好味!


剁鯪魚肉嘅小Tips：
1) 鯪魚多骨, 所以一定要先切薄片, 將骨切碎才剁, 鯪魚餅就唔會有骨。
2) 要放少少鹽係鯪魚片中先剁, 咁樣更易起膠, 剁兩下鯪魚膠就自然會黐刀。
3) 調味後逐少加水, 大概加1/4飯碗水就夠。加水後魚肉會散開, 你要努力攪至起膠, 又再加水, 魚肉又再次散開, 如是者加完D水。咁樣魚餅就會又鬆又彈牙家啦！

材料:
鯪魚1條 (鯪魚連皮起肉, 只要魚柳)
芫茜（切細粒）
蔥（切細粒）
調味料:
生抽、麻油、油、糖、胡椒粉、生粉少許、水1/4碗水

Hot Pot on Thanksgiving Day

今晚跌至１３﹣１４度愛人提議打邊爐，我即刻和議~正！開始咗食先記得影相，好彩愛人未將Ｄ食物嚟個『一煱熟』，哈哈。。。唔知點解男人咁無耐性。今晚之星係citysuper嘅『美國大蜆』同『荷蘭豬腩肉』,勁好味。當然唔少得豆腐,蘿蔔,蜀米,本地牛肉, 墨魚丸等等...美酒佳倄今晚食得好飽阿 :P

蕃茄薯仔通心粉

將剩底嘅 Landing Soup 做早餐: 蕃茄薯仔通心粉, 一湯2種食法, 唔好浪費食物呀！

Landing Soup: 蕃茄薯仔排骨湯

飛咗十幾個鐘, 口乾, 鼻乾, 皮膚乾, 總之成個人好乾, 最好就係飲個湯保保水。今次我為愛人㷛咗個『蕃茄薯仔排骨湯』, 係快靚正之選, 超簡單, 全部材料超市有售, 材料包括：蕃茄，薯仔，紅蘿蔔，洋蔥及排骨，我用咗愛人最 like 嘅軟骨嚟㷛。明火㷛1個鐘, 然後放入真空煲, 明早愛人就有保水靚湯飲啦！

香草煎羊架

記得Maslow嘅Hierarchy of Needs, 食飽係人類最低層嘅需要, 咁係唔係食咩都唔重要, 只要食飽就得呢？同事同我講: 係香港人都餐餐茶餐廳家啦, 食咩都係差唔多啦！明明『生存』同『生活』係唔一樣, 食咩理應有所分別, 唔單單為食飽！生活係一種享受, 過程好重要, 只要你懂得, 生活係美好嘅, Life is beautiful :) 但享受唔一定洗好多錢, 今日嘅晚餐我用咗唔洗$100蚊,就包括香草煎羊架同一杯House Wine (2006年 Cabernet Sauvignon, Robert Mondavi 嘅Private Selections), 既好味又簡單, 依種就係人人都可以享受嘅『生活』！

又係咖哩

今晚我用左屋企嘅剩餘物資, 蜀米芯, 啡蘑菇同蕃茄煮左個懶人快餐﹣咖哩雜菜飯做晚餐。咖哩推介　

蜜糖芥末雞翼

今日有Ｄ心煩煩煩煩煩啊！
食得甜Ｄ, 會唔會開心番呢, 用蜜糖整雞翼＋芥末刺激味覺神經, 另加香草蘑菇意粉,今晚食得好飽飽飽飽飽呀！一個人係山谷講嘢有回音音音音音呀！

快速糯米飯

按「本經逢源」,糯米益氣補脾肺係溫養胃腸嘅好穀類。糯米咁有益今晚一於試下煮糯米飯做晚餐,多得姻伯母教我用電飯煲快速煮糯米飯，只需20分鐘美味嘅糯米飯就煮好啦！要個糯米飯唔好咁淋就要加Ｄ粘米，咁樣口感好好多。以後可以煮多Ｄ糯米飯嚟治木蝨啦, hahaha :)

小提示：

1. 糯米與粘米嘅比例　＝　1 : 0.2（可按個人喜好更改）
   
2. 水嘅份量同煮法跟平日煮飯一樣, 注意: 糯米係唔洗浸嘅, 洗下就煮得。
3. 量水後可加少少鹽調味
4. 唔想臘腸太油，材料可預先蒸５分鐘，去油後才放飯面。另一懶人好方法：先用熱水洗下Ｄ臘腸,咁就無咁肥啦。
5. 差不多飯好就將材料平放在飯面，飯好後焗多一陣。加上蔥粒同花生就有得食啦！係唔係勁簡單呢。快Ｄ煮個暖粒粒嘅糯米飯迎接依個寒冬嘅來臨！

蛋糕堂＠Coup Kitchen

白衣天使 (Angel Blanc)
================
「白衣天使」採用法國製造的白乳酪芝士為主要食材，含豐富維生素與乳脂肪，再加上一層士多啤梨果凍，清新口味，盡在不言中。
From Coup Kitchen

第一次上蛋糕堂好緊張呀,笨手笨腳,忙咗２個鐘頭個ＢＢ出世啦!

個蛋糕係唔係好靚呢？依個係亞 Sir 嘅作品緊靚啦！

至於我做果個就...hehehe...唧得好醜怪,同亞Sir果個差好遠,即係有好大嘅進步空間！今日好開心呀, 可以同家姐們分享一個咁美味嘅蛋糕 :)

So good 炒粒粒

是日晚餐
=======

1) So Good 炒粒粒 ... 餸飯之選
2) 冬茹甘荀蓮藕湯
3) "朋友仔"自家製Tiramisu ... 好好味！

愛心朱古力 Cookie

Sweetie 要考試, 想吃朱古力Cookie, Ah E點會拒絕, 馬上開工, 試做新食譜, 唔知點解個朱古力好難mix, 做出嚟個樣怪怪地，但味道就OK!

















Sweetie 送我的圖畫

香蕉合桃蛋糕

唔加可可粉就變成一樣美味嘅香蕉合桃蛋糕，提子用Rum酒浸泡過，別有風味！因為提子乾有甜味我將糖粉減至40g。食譜　

海苔薄片

海苔薄片改良版, 除糖粉減低外(原食譜用25g), 我將蛋黃改用蛋白, 因為怕了膽固醇過高！

材料：
糖粉15g, 無鹽牛油30g, Vanilla 香油1/2茶匙, 牛奶2湯匙, 蛋白20g, 低筋麵粉40g, 泡打粉1/4茶匙, 海苔粉適量

做法：
1) 將糖粉, 無鹽牛油, Vanilla 香油及牛奶用隔水加熱方式整融，降溫後加入蛋白，用打蛋器攪拌均勻。
2) 將麵粉和泡打粉過篩後，用打蛋器以不規則方式將麵糊攪拌均勻。
3) 用湯匙取適量麵糊放於烤盆上, 待麵糊擴散呈圓片狀, 再撒上適量海苔粉。

檸檬黑櫻子曲奇 (2)

上次檸檬圈嘅酸味唔夠，今次我將檸檬汁增加至30g, 而糖粉減至40g, 就係依種酸味味嘅
檸檬香啦。

Ｄ黑點係『黑櫻子』

香蕉朱古力蛋糕

估唔到香蕉同朱古力咁襯, 依個小蛋糕係初試版，用熟透嘅香蕉做蛋糕原來可以咁香！

材料：
香蕉 70g (去皮後), 鮮奶 20g, 無鹽牛油 55g, 糖粉 45g, 蛋黃 1個, 低筋麵粉 90g, 蘇打粉 1/8小匙, 無糖可可粉10g, 碧加果仁 適量

做法：
1. 將香蕉壓成泥狀，加入鮮奶拌勻。
2. 無鹽牛油室溫放軟, 加入糖粉用攪拌機拌勻, 加入蛋黃以快速方式拌勻。
3. 將(1) 加入(2)中 , 用攪拌機快速拌勻。
4. 將過篩後的粉類加入, 用刮刀以不規則方向拌勻呈麵糊狀。
5. 將麵糊刮入紙模內約7分滿， 將表面抹平。
6. 放入已預熱180度焗爐，焗20-25分鐘左右。

我今天的下午茶

檸檬杏仁圈

氹氹轉, 菊花園, 轉呀轉, 檸檬圈！
檸檬杏仁圈: (27塊)
A) 檸檬糖漿：檸檬皮茸1個, 檸檬汁25g, 細砂糖50g
B) 低筋麵粉180g, 泡打粉1/2tsp, 無鹽牛油50g, 蛋40g, 杏仁適量

做法：
1. 檸檬糖漿：將檸檬皮茸, 檸檬汁加細砂糖, 用小火把細砂糖煮融，放涼待用。
2. 將麵粉和泡打粉過篩後，與牛油用雙手搓揉成均勻的鬆散狀。
3. 將檸檬糖漿及蛋加入(2)中, 用刮刀拌成均勻嘅麵團。
4. 麵團用保鮮膜包好，放入雪櫃鬆弛30分鐘。
5. 取出麵團約15克，用手揉成約13公分的長條狀，再做成圈型。
6. 放入已預熱160度焗爐，焗25分鐘, 熄火後用餘溫焗10分鐘 。

全麥土司(失敗篇）

全麥土司(失敗篇）
＜﹣﹣依個似唔似捲蛋呀！

真慘。。。我想食包包, 唔係要捲蛋。個包焗完出嚟成個蛋捲咁, 只得6cm高, 大概只得半個土司盒高, 我以為個包入爐後會發得起, 上次都ＯＫ，但今次就。。。須左 :(　

我已跟足食譜嘅發酵時間(孟老師的100道面包做全麥土司)，但個包完全發唔起, 一半都無, 高度只得6cm, 真奇怪！唔知係唔係我用嘅全麥粉(低筋粉＋麥粉)同老師用嘅比例不同, 還是酵母不夠呢？今天再來一次, 更改一下高筋麵同全麥粉嘅比例, 看看怎樣 ？

失敗那次用的食譜（今天用的分量）
中種：
高筋麵粉 ... 85g （120g）
全麥粉 ... 120g (全麥粉 80g + 七穀麵包粉 20g)
新鮮酵母 ... 8g
水 ... 130g
主麵團：
高筋麵粉 ... 85g (60g)
奶粉... 10g
鹽 ... 2.5g
糖 ... 15g　　　　
水 ... 50g (40g)
牛油 ... 15g

結果係再次失敗...都是發不起來, 激死我了，唔通係 “酵母” 一睡不醒？？？？

黑芝麻葵花子包

點解又係黑芝麻？因為快, 靚, 正囉。依個包嘅材料簡單, 發酵時間短, 加上有KA幫手...所以又再黑芝麻囉！


















































以上就係加咗葵花子嘅黑芝麻包, 黑芝麻包食譜

藍莓乳酪 muffin

第一次 muffin, 用咗自己frozen嘅鮮藍莓, 另加咗碧加果仁, 而食譜就改自『孟老師的100道小蛋糕』。

藍莓乳酪 muffin (3個, 7 x 5.5 cm 入爐紙杯）
蛋 ... 1 pc
糖 ... 30g
橄欖油 ... 48g
牛奶 ... 28g
乳酪 ... 65g
低筋麵粉 ... 80g
泡打粉 .... 1 tsp
蘇打粉 ... 1/8 tsp
鮮藍莓 ... 適量
碧加果仁 ... 適量

1. 蛋加糖用打蛋器攪勻, 再加入橄欖油攪拌均勻
2. 分別加入牛奶和乳酪, 繼續攪成均勻的液體狀
3. 將過篩的低筋麵粉, 泡打粉和蘇打粉加入第2的液體狀中, 用刮刀輕輕攪拌至均勻的面糊
4. 加入鮮藍莓用刮刀輕輕拌勻
5. 將面糊倒入入爐紙杯, 約7分滿, 將碧加果仁放在面糊上
6. 預熱焗爐, 190度焗25-30分鐘

8號風球的家常便飯

又打風啦...今次叫『黑格比』, 天文台喺晨早新聞巳公布黃昏或會掛８號, 早有心理準備, 但無想過咁早走得, 股市一收所有同事即走, 估唔到我竟然係最後走果個。咁早返屋企，最好整２味！

是日小菜：
1) 涼瓜炒牛肉
2) 香蒜蒸茄子

是日靚湯：
瑤柱豆豆節瓜湯

終於都係8:30pm先開飯！

全麥土司

'Kitchen Aid" 的第2個作品, 我揀咗一路做得唔太滿意嘅全麥土司，今次用中種嚟做。3個山好平均, OK, 收貨！

中種：
高筋麵粉 ... 120g
全麥粉 ... 100g
新鮮酵母 ... 6g
水 ... 130g
主麵團：
高筋麵粉 ... 60g
奶粉... 10g
鹽 ... 2.5g
糖 ... 15g　　　　
水 ... 40g
牛油 ... 15g

1. 將中種材料混合, 用慢速攪拌成糰, 蓋上保鮮膜, 進行基本發酵90分鐘
2. 將中種嘅麵團與主麵團材料混合, 先用慢速攪拌成糰, 再用中速攪至稍具光滑
3. 加入牛油用慢速拌入，再用中速攪至可拉出薄膜
4. 麵團放入容器內蓋上保鮮膜, 進行第二次發酵60分鐘
5. 把麵團分成3份, 滾圓 蓋上保鮮膜, 靜置 10分鐘
6. 麵團搟成長約20公分，濶約10公分的橢圓形，翻面後輕輕捲成圓柱體，放入土司模內，進行最後發酵50分鐘 (至９分滿）
7. 在麵團上刷蛋白, 210度焗30分鐘

薑汁梳乎厘

Bookmark咗依個食譜好一段時間, 終於有機會試下, 第一次做得麻麻地, 這個甜品一定有下次！

薑汁梳乎厘 (2人份, 2 x 9.5cm x 6 cm 烤杯）
材料：
薑汁... 30g
砂糖 ... 25g (原食譜50g, 我喜歡少甜, 糖份減半, 甜味剛好）
蛋黃 ... 2隻
蛋白 ... 2隻
低筋麵粉 ... 26g
淡忌廉 ... 80g (原食譜90g, 但屋企係得咁多）

1. 將2個mixing bowl放入雪櫃雪15分鐘, 備用
2. 用200度火預熱焗爐
3. 將其中1個mixing bowl取出, 將淡忌廉用攪伴機打至8成企身, 再加入薑汁及麵粉, 用膠刮拌勻備用
4. 將蛋黃+2/3砂糖用攪伴機打至奶白色濃調狀, 再倒入忌廉麵粉漿內用膠刮輕手攪勻, 備用
5. 將另1個mixing bowl取出, 將蛋白用攪伴機打至8成企身, 將剩下1/3砂糖倒入, 用攪伴機打至9成企身, 再倒入忌廉麵粉漿內用膠刮用FOLD-IN方法攪勻
6. 將混合好既忌廉麵粉漿倒入梳乎厘小杯內, 190度入焗爐20分鐘, 至金黃
　＊如未升起就焗耐少少, 如見變焦就表示焗得太耐或火力太猛

入秋滋潤靚湯

這個滿身泥土嘅東西，你估下喺嘜東東？

菊薯是也, 又名雪蓮薯或雪蓮果 (Yacon), 這東東原產於南美洲的安地斯山脈, 含有豐富的水份與果寡糖, 可以當生果食。切開有D似薯仔, 個邊有D透明, 好快變黑, 我無生食唔知咩味，蘋果日報咁寫: 咬落爽口有雪梨味, 不是太甜,有種野菜味道。我就用嚟㷛湯, 菜檔老板娘推介用甘筍, 蜀米, 栗子煲豬展。