2008 生日快樂

原來簡單可以= 開心窩心, 多謝家姐, 姐夫, 細妹, 姨甥仔, 朋友仔, 朋友女, 同學仔...等等送俾我嘅祝福, 你地嘅心意我全部收到, 多謝囇你地呀, I love you ALL !

* 特別名謝朋友女嘅 Blueberry Cheese Cake, 係唔係好靚呢, 自家製嘅當然好味Ｄ啦！

另外仲有愛人送嘅蛋糕，不過係唔食得嘅...睇下, 相信愛人知道我最近戀上搓包同整餅, 蛋糕當然係最好嘅禮物 :)

彈彈吐司

彈彈吐司食譜係由Cass' Baking Lab提供, 依款吐司真係幾彈, 不過實在太濕, 很難造型。最後發酵後只可用軟刮將個好濕嘅麵糰盡量拉長, 捲成卷狀, 然後入模，過程非常“論盡”。因個麵團太濕，無法做“發酵完成”測試(指孔不回縮), 只好估估下，焗好先知得唔得。今次個吐司食就食得，但發酵過左籠，個吐司粗糙左一Ｄ，下次再試！

材料:（12兩吐司模)
高筋粉 ... 264g
低筋粉 ... 66g
新鮮酵母 ... 15g
糖 ... 25g
鹽 ... 3g
水 ... 216g
牛奶 ... 50g
牛油 ... 20g

1. 所有材料用機打至不黏盤邊
2. 把麵團刮進MIXING BOWL,發酵30分鐘
3. 翻麵, 用膠刮把麵團外圍黏起, 拉往中央, 使麵團排氣和縮小, 繼續發酵30分鐘
4. 把麵團分成3份, 輕手拉長, 捲成3卷 (手粉不可少,小心不要弄破麵團,就較不會黏)
5. 鬆弛10分鐘
6. 吊起麵團的一端讓它拉長, 捲成卷狀,入模
7. 發酵至八成滿, 約25分鐘
8. 190度焗35分鐘

意大利麵包條

登登登登...日本百力滋嘅意大利朋友，有芝士，芝麻，香草番茄，黑椒, 咁多Friend最好開Party啦!

意大利麵包條:
高筋麵粉 ... 125g
全麥麵粉 ... 25g
老麵 ... 50g
速發酵母 ... 1/4茶匙
砂糖 ... 5g
牛奶 ... 90g
Parmesan 芝士粉 ... 1 1/2湯匙
無鹽牛油 ... 10g

1. 將所有材料混合(除牛油外)成麵糰, 再加入牛油搓至光滑並起薄膜狀
2. 第一次發酵約60分鐘至2倍大
3. 取出輕壓放氣, 滾圓, 靜置 20分鐘
4. 將麵糰擀平, 切成約1 - 1.5 cm長條, 放在焗盤上, 在麵包條面刷上蛋白, 灑上芝麻, 香草或芝士　
5. 第二次發酵約30分鐘
5. 預熱焗爐，170度焗15分鐘至金黃色

一個人嘅星期天：Scone, 墨西哥薄餅 & 茶凍

今日可以任性Ｄ啦, 鍾意煮咩都得, 只要【老子高興】, 因為愛人出左Trip。。。哈哈哈

＊Sunday Brunch
提子 Scone
琴日喺Sogo見到有 Kyoho Grapes【巨峰提子乾】, 用嚟做 scone 會唔會好味Ｄ呢, 一盒特價28大元，用左少少嚟做 scone, 本來依２小個 scone 係今日嘅早餐，點知變左brunch。






食譜 ：(２小個)
高筋麵粉... 25g
低筋麵粉... 25g
發粉 ... 2.5g
牛油... 12g
牛奶 ...20g
雞蛋 ... 13g
糖 ... 5g
提子乾 ... 7g

做法：
1) 麵粉及發粉過篩後雪凍(約10分鐘), 加入切丁牛油(不用室溫), 用手將牛油及麵粉均合至沙粒狀
2) 牛奶和雞蛋從雪櫃取出, 加入糖拌勻後, 倒入(1)中, 以切拌型式將粉糰混和
3) 加入提子乾後, 將麵糰搓成一團, 放入雪櫃1小時
4) 取出麵糰, 擀成2cm厚, 再放入雪櫃1小時
5) 造型後塗上蛋汁, 180度焗15分鐘至金黃色
**食譜來至vanlily breadessert


＊Early Dinner
黑椒牛柳墨西哥薄餅
餡料：
牛柳 ...１件 (切條）
翠肉瓜 ... 半個 (切長條)
洋䓤 ... 半個 (切長條）　
黑椒 ...適量 (調味用）

墨西哥薄餅：（2塊）
1）All purpose 麵粉 ...60g
2) 發粉 ... 1/3茶匙
3) 鹽 ... 少許
4) 油 ... 1/3湯匙
5) 水 ... 30g

1) 將 1-3 項材料過篩後加油混合，而水就可以遂少加，將麵糰搓勻至光滑唔黏手就可以 (D水唔一定要全部落晒）
2) 將搓好嘅麵糰分成2份, 靜置20分鐘後擀平
3) 用白鑊將擀平嘅薄餅烘至乾身

原來薄餅咁易整，以後可以成日墨西哥啦　:)　
謝謝這位網友嘅食譜~大少奶's Delicatessen

＊Dessert
Lego 梅子綠茶凍


































＊Life is wonderful ~ 今日好充實呀！

芥末沙律醬碎蛋包

記得第一次去日本旅行食過一款三文治用芥末沙律醬同碎蛋做餡, 覺得好好味好特別，又係果種一試就鍾意左！今日做左個無蛋包底，本來想用嚟做肉鬆包，打開雪櫃見到支芥末沙律醬，最後就做左依個包。
　
食譜：(來自 Cass' Baking Lab 的無蛋包底)

包底材料　
高筋麵粉 ... 250g
新鮮酵母 ... 8g
鹽 ... 5g
糖 ... 13g
水 ... 100g
牛奶 ... 60g
牛油... 20g

碎蛋料
蛋...1隻
天使仔芥末沙律醬...適量
**將蛋煲熟, 切碎加入適量沙律醬混和

做法:

1. 將所有材料混合(除牛油外)成麵糰, 再加入牛油搓至光滑並起薄膜狀
2. 第一次發酵約45分鐘至2倍大, (用食指在麵糰中間刺到底，試試麵糰是否發酵好，如食指抽出，指孔不回縮，就表示發酵完成。）
3. 取出輕壓放氣, 把麵團分割成６份, 滾圓, 靜置 10分鐘
4. 造型, 第二次發酵約30分鐘, 發至2倍大
5. 180度焗12-15分鐘

健康早餐：麥麩包

今早有時間搓個包包做早餐, 個包又香有熱, 好好味呀 :p
是日早餐：　
1) 木瓜
2) 番茄炒蛋配麥麩包　
3) 咖啡或茶

＊用麥麩(Wheat Bran)做包比起用麥粉更香，而且非常健康。$20-30就買到 500g，用左27g 做左6個約60g嘅麥麩包, 個包已好有麥香，如果想個包靚仔Ｄ，可以入爐前在包面放些麥麩，焗出來會更脆更香。

食譜及做法

自家製豆漿 (2)

好耐無做豆漿, 前幾日清理廚房時搵到好幾包黃豆(Citysuper 博多豆)，博多豆比起其他日本產的黃豆，平好多，不過只於ＣＷＢ出售, (記得係＄１０，依家唔知有無加價)。突而其來的 long weekend, 最好清理一下這堆久遺了的豆豆。今次用布袋隔渣，試下可否節省Ｄ時間，因為加Filter後，個攪拌機剩番嘅空間不多，要分多幾次打碎Ｄ黃豆。今次我浸了５CUPS (量杯)黃豆，想做個濃味Ｄ嘅豆漿，做好之後約有1800ml。

＊＊食譜及做法

今次有個入瓶小幫手，唔再漏到瀉曬，再隔多一次，豆漿就更滑。

『日式Homemade cuisine』蜆肉蕎麥麵/咖喱雜菜飯

午餐: 蜆肉蕎麥麵
鸚鵡果然利害，今天掛起9號風球！ 打風唔想出街，而今早吃了芝心包仍有Ｄ『漏漏地』，午餐想食得 light D。決定煮蕎麥麵，用蜆肉味噌湯做底（係太古城嘅ＡＰＩＴＡ買，未試過這款味）煮好後個樣好得，可能係蜆肉付殼，而個湯係出奇咁鮮甜，不過Ｄ蜆肉就麻麻地，海鮮都係新鮮好食D。


































晚餐：咖喱雜菜飯
一款勁好味又易做嘅菜式, 每次愛人出差去，我一定煮俾自己食, 這菜式特別適合一人用，有飯有菜，健康又好味：）我就最鍾意『4 號』中辛個味，係『House』嘅出品 。飯後甜品，當然係愛人最愛綠茶豆腐布丁, 襯到絕，簡簡單單 ... 好幸福！　

芝心包﹠肉鬆包

又有颱風啦，它的名字叫鸚鵡！ 雖然依家仲係3號，但聽講鸚鵡會直吹香港，明早掛８號...達到99%！今晚一於做包包，明早有嘢食啦！想做芝心包，又想做肉鬆包, 想來想去，一不做，二不休...哈哈哈...一包兩吃！ 用了“笑牛牌”芝士做芝心, 一個包一粒！至於個肉鬆包就用了台灣黑橋牌，是我最愛的肉乾品牌。



















食譜：
高筋麵粉 ... 190g
低筋粉 ... 90g
新鮮酵母 ... 15g
鹽 ... 5g
糖 ... 20g
奶粉 ... 12g
蛋 ... 30 g
水 ... 140g
老麵 ... 100g
牛油... 30g

做法:

1. 將所有材料混合(除牛油外)成麵糰, 再加入牛油搓至光滑並起薄膜狀
2. 第一次發酵約30分鐘至2倍大, (用食指在麵糰中間刺到底，試試麵糰是否發酵好，如食指抽出，指孔不回縮，就表示發酵完成。）
3. 取出輕壓放氣, 把麵團分割, 約80g一份, 滾圓, 靜置 10分鐘
4. 造型, 第二次發酵約30分鐘, 發至2倍大
5. 180度焗12-15分鐘

＊＊　
焗完包包浸個熱水浴，歎下先　：）
個浴鹽係家姐係泰國買回來嘅手信！

檸香杏仁曲奇

愛人個best friend~朗仔鍾意食依款曲奇，為左取悅他，假期只好開焗多一次咁多啦！　

檸香杏仁曲奇食譜：

1) 淡牛油...70克
2) 糖粉...40g (原食譜50g, 下次再焗會試30g，酸酸地醒神D)
3) 低筋麵粉...120g
4) 蛋...１隻
5) 檸檬皮...1湯匙
6) 檸檬汁...1湯匙
7) 蜜糖...2茶匙
8) 杏仁...適量

1) 牛油室溫軟化後打勻後, 加入已篩的糖粉
2) 再加入蛋後打勻 (分2次加入牛油中)
3) 最後加入已篩的低筋粉, 蜜糖, 檸檬皮, 檸檬汁及杏仁拌勻。
4) 用小匙把約10g 的粉糰放在牛油紙上
5) 將曲奇放入已預熱的焗爐內，以180℃焗約15-20分鐘

曲奇禮盒, 祝生日快樂!

送俾至愛家姐，祝生日快樂！曲奇禮盒包括：燕麥紅莓曲奇, 杏仁咖啡曲奇 & 至愛biscotti.
杏仁咖啡曲奇 & biscotti都是家姐至愛，另外我特別為她做了個健康之選「燕麥紅莓曲奇」，希望她鍾意：）










燕麥紅莓曲奇食譜：

1. 淡牛油...５０克
2. 黑糖...４０克
3. 低筋麵粉...５０克
3. 即食燕麥片...５０克
4. 紅莓...３０克
5. 發粉...１/６茶匙
6. 蘇打粉...１/６茶匙
7. 蛋隻...３０克
8. 雲呢拿香油...數滴
9. 鹽...少許

做法：
1. 將麵粉,鹽,梳打粉及發粉過篩備用。
2. 牛油室溫軟化後打勻,加入黑糖打至軟。
3. 然後分２次加蛋拌勻，再加入雲呢拿香油。
4. 將粉類加入（３）裏面, 在未完全混合前加入燕麥片及紅莓，混和。
5. 將麵團分成8克一份搓至圓形後輕按平（可先將麵團放入雪櫃15-20分鐘，待麵團硬身一點較易造形）。
6. 放入已預熱180度焗爐，焗12分鐘。

超鬆曲奇 2nd Attempt

再來咖啡曲奇,今次用了Nescafe Espresso咖啡粉，Ｄ粉真係幼細好多，可以完全溶入麵糊裡面。成功了，哈哈！

榛子曲奇

昨晚已經掛了3號風球，今次個風來得咁突然，而且外面Ｄ風好大，不知明天會不會掛8號! 哈哈...真係8號呀，多了一日假，一於繼續做餅！

貞貞姨落order,想食有果仁嘅原味曲奇，我就做了個『榛子曲奇』俾她試下，希望她鍾意啦。



食譜:
牛油...112g
糖粉...30g
鹽...1g
低筋麵粉...75g
高筋麵粉...75g
榛子...50g
榛子粉...10g





做法:

1. 焗香榛子及敲碎備用
   
2. 牛油室溫軟化後打勻,將鹽及糖粉加入打勻至軟白
   
3. 加入已篩的麵粉,榛子粉及敲碎的榛子粒伴勻
   
4. 將麵團分成10g一份搓至圓形（可先將麵團放入雪櫃15-20分鐘，待麵團硬身一點較易搓至圓）
   
5. 然後放在牛油紙的焗盤上，預熱焗爐5分鐘，用170度，焗20分鐘。
   

杏仁朱古力曲奇 for sweetie

真開心...小朋友都愛我做的曲奇！昨晚做了個新款的『杏仁朱古力曲奇』再給可人兒品評下, 這款曲奇對我來說太甜了, 不過做給小朋友吃甜少少是沒錯了!

食譜:（約40塊)
牛油...100g
糖粉...40g
黑糖...40g
蛋...20g
低筋麵粉...135g
朱古力粉...18g
黑朱古力粒...30g
白朱古力粒...30g
杏仁粒...20g
梳打粉...1/4茶匙

做法:

1. 牛油室溫軟化後打勻,加入糖打勻
   
2. 再加入蛋後打勻
   
3. 加入已篩的低筋粉,朱古力粉,梳打粉,朱古力粒及杏仁粒拌勻
   
4. 再將麵團分成40等份(每粒約10g）用匙輕按平
   
5. 然後放在牛油紙的焗盤上，預熱焗爐5分鐘，用170度，焗12分鐘。
   

合桃麥麩包

終於買到麥麩(Wheat Bran), 可以做個『至愛包包』俾自己。不過唔知點解第二次發酵後包包上面Ｄ花紋變得模糊，焗完出爐仲離譜,Ｄ花紋無灑。不過，好軟熟, 好味。

食譜：（4個份量）
高筋麵粉　。。。160g
麥麩　。。。27g
新鮮酵母　。。。8g
鹽　。。。2.5g
糖　。。。2.5g
水　。。。127g
老麵　。。。53g
牛油　。。。13g
合桃　。。。適量

做法:
1. 將所有材料混合(除牛油外)成麵糰, 再加入牛油搓至光滑並起薄膜狀
2. 第一次發酵約45分鐘至2倍大，取出輕壓放氣
3. 把麵團分割成4份, 滾圓, 靜置 10分鐘
4. 造型, 第二次發酵約30分鐘, 發至2倍大
5. 190度焗15分鐘

超鬆曲奇 Trial Test

聽說用金罐牛油做唧花曲奇特別鬆趣，特意去ＣＷＢ果間材料鋪買了一罐試做，結果真係好鬆趣，值回票價！


材料 : (原味）
無鹽牛油 ... 120g
糖粉 ... 50g (原食譜63g)
蛋白 ... 30g
高筋粉 ...75g
低筋粉 ...45g
鷹栗粉 ...45g
雲呢香油 1-2滴 (可不用)

＊以上是基本材料，如要做其他味道只要加入如咖啡粉(6g)，便成為咖啡曲奇了。不過，今次用嘅咖啡粉唔能夠完全溶入麵糊裡，焗完出來Ｄ曲奇有斑點，但個味就好香，朋友們都好鍾意！

做法 :
1. 預熱焗爐180 度 10 分鐘
2. 將所有粉類過篩備用
3. 將牛油 (室温) 與糖粉打至鬆軟發白, 分二次加入加入雞蛋,打至忌廉狀態
4. 分2次加入篩好粉, 攪至忌廉狀態
5. 將麵糊倒入已裝了唧咀袋內,唧出型狀放在牛油紙盤上.
6. 放入已預熱焗爐內180度焗10-15分鐘至金黃, 再轉150度焗5-10分鐘 (熄火焗一會收乾水份, 曲奇會更鬆化)
7. 取出放在放涼架至涼後即放入密實盒

(食譜來自 AM730 廚神 輝 Sir)

軟綿綿白吐司

聽說用新鮮酵母較易成功，前幾天在二德惠買到梅山出品的鮮酵母，另在網上找到一個用鮮酵母的彈彈波吐司食譜，前晚一於來個Trial Test。唔知係鮮酵母嘅威力還是個食譜，做出來嘅吐司真係好軟好綿，以前未試過的。

材料: (450g 吐司模)
高筋粉。。。264g
低筋粉。。。66g
新鮮酵母。。。15g
糖。。。25g
鹽。。。3g
水。。。216g
牛奶。。。50g
牛油。。。20g

做法：
1. 所有材料(除牛油外)做成麵團
2. 加入牛油搓至光身並起薄膜狀，後滾圓準備發酵。
3. 第一次發酵約30分鐘至2倍大
4. 取出麵糰輕壓放氣，然後分成3等份滾圓, 靜止約10分鐘
5. 拉長,捲成3卷入模
6. 發酵至8成滿，約30分鐘（入爐前我的 麵團巳發酵至9成滿）
7. 190度焗35分鐘

** 原食譜的水份很高, 有Kitchen Aid 幫忙沒問題, 但我用手做麵團, 太黏手, 我減了水份。

迷你冬瓜盅

冬瓜粒湯是我小時候的家常便湯，我忽發奇想如用相同材料，可否做個高貴一點的宴客靚湯。多謝菜檔老板娘指點，做出來的冬瓜盅似模似樣。：）